Өнөөдрөөс /2023.12.18/ эхлэн тээврийн хэрэгслийг улсын дугаарын тэгш, сондгойгоор замын хөдөлгөөнд оролцуулах зохицуулалт, Нийслэлийн засаг даргын захирамж хэрэгжиж байна.
Уг зохицуулалтыг зөрчсөн тохиолдолд ямар хариуцлага хүлээлгэх талаар ТЦА-ны ЗЦГ-ын дэд дарга, хурандаа Ч.Батболд дараах мэдээллийг хийсэн байна.
Ч.Батболд:
-"Замын хөдөлгөөний дүрэмд тээврийн хэрэгслийн урд, хойд талд улсын дугаарыг бэхэлж явах жолоочийн үүрэг бий. Улсын дугааргүй тээврийн хэрэгсэлтэй замын хөдөлгөөнд оролцвол Зөрчлийн тухай хуулиар хариуцлага тооцдог.
Тээврийн хэрэгслийн улсын дугааргүй, улсын дугаараа халхалсан, өөр дугаар сольж зүүсэн, хуурамч дугаартай замын хөдөлгөөнд оролцсон бол Зөрчлийн тухай хуулийн 14.7.13-д заасны дагуу хувь хүнийг гурван сар хүртэл хугацаагаар жолоодох эрхийг хасаж, 50,000 төгрөгөөр, харин ААН, байгууллагыг 500,000 төгрөгөөр торгох зохицуулалттай.
Хязгаарлалтын бүсчлэлд тэгш тоогоор явах өдөр сондгой тоотой дугаартай тээврийн хэрэгслээр хөдөлгөөнд оролцсон бол Зөрчлийн тухай хуулийн 14.7.57 дахь заалтын дагуу 20,000 төгрөгөөр торгоно" гэв.
Дугаарын хязгаарлалтад хамаарахгүй тээврийн хэрэгслүүд:
- Зохих зөвшөөрөл, тоноглол бүхий бүх төрлийн хүнсний бүтээгдэхүүний түгээлт, татан авалтын тээврийн хэрэгсэл
- Оршуулгад явж буй тээврийн хэрэгсэл
- Авто зам, хот тохижилт, шугам сүлжээний засвар, үйлчилгээний тээврийн хэрэгсэл
- Дипломат байгууллага болон гадаад улсын зочин, төлөөлөгчид үйлчлэх тээврийн хэрэгсэл
- Сургууль, цэцэрлэг, байгууллагын ажилчдыг тээвэрлэх үйл ажиллагаанд ашиглах тээврийн хэрэгсэл
- Нийтийн тээвэр, стандартын шаардлага хангасан такси үйлчилгээ
- Таних тэмдэг бүхий хэвлэл мэдээллийн байгууллагын тээврийн хэрэгсэл.
