Хүйтний улирлын галлагаанаас үүдэлтэй амьсгалын замын өвчлөл, агаар, орчны бохирдлыг бууруулах, технологийн дэвшил, сайжруулалт хийх зорилгоор мидлинг болон ангилж ялгасан нүүрс түлдэг аж ахуйн нэгж, байгууллагуудын төлөөлөлтэй уулзжээ.
Энэ үеэр Хотын дарга Х.Нямбаатар "Жилд 100 гаруй мянган тонн мидлинг хүлээлгэж өгч, халаалтын зуухны яндангуудад шүүлтүүр тавиад ирэх жилийн яг өдийд агаарын чанараа хэмжиж үзье.
100,000 айлын зуухыг шинэчилнэ. Үүнээс 20,000 нь цахилгаан, 80,000 нь давхар шаталттай зуух байна. Үлдсэн 10,000 орчим айлын газрыг ирэх оны арванхоёрдугаар сард чөлөөлж, орон сууцанд оруулах, түрээслэх, худалдах аль нэг сонголтоор зохицуулна.
Автомашинуудын янданг шинэчилж, сольё. Нэг жилийн дотор утааг багасгахад бидний хийж чадах хамгийн эхний ээлжийн ажлууд энэ гэдгийг уриалж байна" хэмээжээ.
Улаанбаатар хотод дулаан, уур үйлдвэрлэгч 174 уурын зуух ажилладаг бөгөөд зарим нь мидлинг буюу угаасан нүүрс, зарим нь шигшсэн нүүрс хэрэглэж байгаа аж.
