Япон улс амиа хорлолтын тоогоор өндөрт ордог ч 2003 - 2017 он хүртэл 38 хувиар буурч чадсан байна. “Их 20”-ийн улсуудын дотор амиа хорлолтын тоогоор Өмнөд Солонгос нэгд, ОХУ хоёрт, Япон гуравт орсон байна. Мөн дийлэнх нь эрэгтэйчүүд байдаг бөгөөд амиа хорлолтын бараг 90 хувь нь сэтгэл гутрал, стрессээс үүдэлтэй. Япон улсад иргэд хэт их ажилласны улмаас амиа хорлох тохиолдлууд ихээхэн гардаг. 

Япон улсын ахлах сургуулийн багш Хидэфүми Ёошида сургуулиудаар зургаан жилийн турш уйлахын ач тусыг ярьж, түгээж явж буй нэгэн. 

Тэрбээр “Japan times”-д өгсөн ярилцлагадаа “Стрессийг багасгахын тулд уйлах нь инээж, унтахаас илүү үр дүнтэй. Хэрвээ хүн долоо хоногт нэг удаа уйлвал сэтгэлийн дарамтаас ангижирч, бухимдалгүй амьдарч чадна” гэжээ.

1980 оны эхээр Миннеаполис дахь Рамсей эрүүл мэндийн төвийн доктор Уиллиам Фрей яагаад хүмүүс уйлдаг болох, сэтгэл хөдлөлийн нулимсны тухай анхдагч судалгаануудын нэгийг хийжээ. Тэрбээр хүмүүс уйлахад стресс агуулдаг даавар гадагшилдаг болохыг тогтоосон байна. Түүнчлэн уйлахад амьсгаа удааширч, сэтгэл санааг сайхан болгох эндорфин даавар ялгардаг гэнэ.

Мөн 2014 онд Ёошида Тохо их сургуулийн Анагаахын факультетын профессор Хидэхо Аритатай хамтран уйлах нь хэрхэн стресс үгүй хийдэг тухай судалгааг эхлүүлжээ. 

Хүний бие гурван төрлийн нулимсыг ялгаруулдаг байна. Нэгдүгээрт, бидний нүдийг чийгтэй байлгадаг тасралтгүй үргэлжлэх нулимс, хоёрт бидний цочролыг арилгадаг рефлекс нулимсыг гаргадаг. Харин гуравт судалгаагаар тогтоогоод буй эрүүл мэндэд тустай сэтгэл хөдлөлийн нулимс гэнэ. 30 улс орныг хамруулсан энэхүү судалгаанаас үзэхэд ихэнх оролцогчид уйлсны дараа сэтгэл санаа илүү тайван болдог гэж хариулсан байна.

Та сайхан дуу сонсоод эсвэл кино үзээд уйлж, түүний дараа хамаагүй аз жаргалтай, хөнгөн мэдрэмж авч байсан бол долоо хоногт ядаж нэг удаа ч болтугай нулимсаа гаргаж, сэтгэлээ хөнгөлж байгаарай хэмээн эрдэмтэд зөвлөсөн байна.