Олны анхааралд байгаа хэргийн мөрдөн шалгах ажиллагааны талаар АТГ-ын Хэвлэл мэдээлэл, олон нийттэй харилцах ажилтан, комиссар Н.Тэмүүлэн сэтгүүлчдийн асуултанд хариуллаа. Мэдээллийн товчийг хүргэж байна.

-"Тавантолгой төмөр зам" компанийн гүйцэтгэх захирал асан Н.Удаанжаргалын хаана байгааг нийтэд мэдээлэх боломжгүй байна. Учир нь байгаа газраа олон дахин өөрчлөөд байгаа болохоор буцаан авч ирэхэд хүндрэл бий болоод байгаа юм.

-Ерөнхий сайд асан Ч.Сайханбилэг болон Н.Удаанжаргал нарыг интерполоор эрэн сурвалжилсан хэвээр байна.

-Шүүх рүү шилжсэн сайд асанд холбогдох хэрэгт УИХ-ын гишүүн Ц.Анандбазарын холбогдол бий. Тухайн гишүүн өөр хэрэгт шалгагдаж байгаа тул тусгаарлаад нөгөө хэрэгт нэгтгэн шалгаж байгаа. Шүүх рүү үндсэн хэрэг нь явсан.

-УИХ-ын гишүүн Т.Доржханд нүүрсний хэргийн улмаас 44 их наяд төгрөгийн хохирол учирсан гэж мэдэгдсэн учир түүнээс мэдүүлэг авсан. Түүний хэлсэн дүн тогтоогдоогүй. Тэрбээр үндэслэлтэй тооцоолол хийсэн талаарх мэдүүлгээ өгөөгүй гэсэн үг.

-ХХБ-ны ТУЗ-ийн дарга Д.Эрдэнэбилэг эрэн сурвалжлагдаж байгаа. Мөрдөн шалгах ажиллагаанд саад учруулаад байгаа учир энэ талаар дэлгэрэнгүй мэдээлэл өгөх боломжгүй.

-ИНЕГ-ын үе үеийн удирдлагууд сургалтын төлбөртэй холбоотой эсэхийг шалгаж байна.

-УИХ-ын гишүүн Д.Бат-Эрдэнэ, А.Адъяасүрэн нарт холбогдох хэргийн мөрдөн байцаалт дууссан. Хэргийн холбогдогч нарт хэргийн материалыг танилцуулах ажиллагаа явж байгаа. УИХ-ын гишүүн Н.Наранбаатартай холбогдох эрүүгийн хэрэг одоогоор мөрдөн шалгах ажиллагаанд байна.