Монгол Улсын Их Сургуулийн төв байрыг нураах тухай мэдээлэл өнгөрсөн амралтын өдрүүдэд цахим сүлжээнд нийтлэгдэж, шинээр барих барилгын зураг төслийг үзүүлсэн билээ. Тус сургуулийн гуравдугаар байрыг нурааж эхэлсний дараа цацагдсан энэ мэдээлэл МУИС-ийг төгсөгчид болон олоннийтийн зүгээс ихээхэн эсэрэгүүцэл, шүүмжлэлийг дагуулаад байгаа юм. Тэгвэл энэ мэдээллийг тус сургуулийн хэвлэлийн төлөөлөгч үгүйсгэжээ.
"МУИС-ийн төв байрыг нураана гэсэн нь ташаа мэдээлэл. Тийм зүйл байхгүй. Зарим сайтууд, соошилд оруулж буй зураг нь МУИС-ийн 75 жилийн ойгоор буюу одоогоос зургаан жилийн өмнө зохион байгуулсан Хөрөнгө оруулалтын форумын үеэр танилцуулсан МУИС-Кампус төслийн зураг байна.
Өөрөөр хэлбэл, тухайн үед хичээлийн болон оюутны байраа шинэчлэн сайжруулах төсөл боловсруулж хөрөнгө оруулагчдад танилцуулж байсан, хөрөнгө мөнгө байвал ийм байдлаар шинэчлэх боломжтой юм гэсэн санал. Тэр төсөлд төв байрыг нураах тухай үг, үсэг байхгүй" гэсэн байна.
