Улаанбаатар хотын түгжрэлийг бууруулах хүрээнд нийслэлийн дөрвөн байршилд авто замын доогуур нүхэн гарц байгуулахаар болсон. Үүний нэг болох Таван шарын төмөр зам доогуурх нүхэн гарцын бүтээн байгуулалт 68 хувьтай үргэлжилж байна. Бүтээн байгуулалтыг “Чайна Тисижу Сивил Инженеринг Групп” ХХК гүйцэтгэж буй. 

Хотын дарга Х.Нямбаатар:

-Арваннэгдүгээр сарын 8-нд болсон түгжрэлийн гол шалтгаануудын нэг нь дулааны цахилгаан станцууд өдрийн цагаар галт тэргээр 28 удаа нүүрс нэмж авсан явдал. Иймд энэ байршилд нүхэн гарц ашиглалтад орвол төв зам буюу Энхтайвны өргөн чөлөөнөөс баруун тийш 22-ын товчоо хүртэлх авто замын хөдөлгөөн галт тэрэгний хөдөлгөөний улмаас саатахааргүй болох юм.

Улаанбаатар хотын авто замын түгжрэлийг бууруулах нэгдсэн төслийн нэгжийн ерөнхий инженер Я.Өнөртүвшин: 

-Судалгаанаас үзэхэд Таван шарын төмөр зам орчимд авто замын хөдөлгөөн өдөрт дунджаар 2 цаг 40 минут хязгаарлагдаж байна. Өөрөөр хэлбэл, төмөр зам болон авто зам нэг түвшинд огтлолцсонтой холбоотойгоор авто замын хөдөлгөөн саатаж байдаг. Тиймээс нүхэн гарц хийснээр замын хөдөлгөөний ачаалал буюу түгжрэл буурна. Нүхэн гарцын зорчих хэсэг дөрвөн эгнээтэй, 5 м өндөр учраас нийтийн тээвэр болон ачааны машин нэвтрэх бүрэн боломжтой. Мөн борооны болон гадаргын ус зайлуулах помпын насос хийнэ. 

“Улаанбаатар хотын төмөр замын доогуур авто замын нүхэн гарц байгуулах төсөл”-ийн захирал Жан Хао:

-Өнөөдрийн байдлаар төлөвлөгөөний дагуу хавтангийн цутгалтыг хийж байна. Хүйтний эрч чангарах учраас удахгүй ажлыг зогсоож, ирэх оны гуравдугаар сарын сүүл, дөрвөн сарын эхээр үргэлжлүүлэн, хоёрлдугаар улиралд ашиглалтад оруулахаар ажиллаж байна.

БНХАУ-ын хөнгөлөлттэй зээлээр

• Таван шарын төмөр зам

• Геологийн төв лабораторийн уулзвар

• “Гермес” төвийн төмөр замын зоорь

• Нарны зам болон Их хүрээний гудамжны уулзвар гэсээ дөрвөн байршилд нүхэн гарц байгуулах юм.