Өчигдөрөөс эхлэн зарим хэвлэл мэдээллийн хэрэгслээр "400 автобус" гэх гарчигтай, эл хэргээр Ерөнхийлөгч асан Х.Баттулга, Сангийн сайд асан С.Баярцогт нарыг шалгуулах тухай мэдээлэл хөвөрсөөр байна. 

Хотын шинэ дарга Х.Нямбаатар ажлаа аваад хамгийн эхний мэдээлэлдээ "2009 оны нийтийн тээврийн парк шинэчлэлийн хүрээнд БНСУ-аас оруулж ирсэн 400 автобусны шууд худалдан авалт нь хууль зөрчсөн" хэмээн мэдээлсэн. Цаг хугацааг нь хөөвөл энэхүү хэрэг тухайн үеийн Зам тээвэр, барилга хот байгуулалтын сайд Х.Баттулга, Сангийн сайд С.Баярцогт нарт хамаарах аж. Нэг ёсондоо өчигдөрхөн болсон ногоон автобусны хулгайг биш 14 жилийн өмнөх автобус худалдан авалтыг сөхнө гэсэн үг юм. Мэдээж МАН-д АН-ын гишүүн байсан хэн нэгэн нүдэнд нь үзэгдэх нь шинэхэн зохиол бичихэд ашигтай байна. Энэ бол нэгэнтээ түмэнд түгсэн мартагдуулах технологи. 

Харин энэхүү өнгөрснийг ухаж гаргаж ирж, өөрсдийн хулгайгаа хаацайлах гэсэн мэдээллүүд нь Хотын сайд асан Ж.Сүхбаатарт хурдан үйлчлээд эхэлчихэж. Тэрээр өнөөдөр сэтгүүлчдээс зугтаж явахдаа хэд хэдэн үг хэлээд амжив. 

Тэрээр "Би тайлбар өгөөгүй. Би гэм буруутай биш юм чин юу гэж хариуцлага хүлээх юм. Би буруугүй. УИХ-ын гишүүнийхээ бүрэн эрхээс татгалзаж, шалгуулах шаардлага байхгүй. Ногоон автобус гэмт хэрэг биш. Би ёс зүйн хариуцлагаа хүлээгээд сайдаас буусан" гэв. 

Ингээд Ногоон автобусны хэрэг замхрах зам руугаа нэгэнт орсоон гэхэд болохоор байна.

Аливаа хэрэгт холбогдсон УИХ-ын гишүүнийг шалгаж, гэм буруутай эсэхийг нь тогтооход бүрэн эрх, гишүүний халдашгүй байдал нь саад болдог нь үнэн. Гэтэл хэдэн тэрбумаар хэмжигдэх хулгайн асуудалд сайдаас буугаад л хариуцлага хүлээчихдэг болжээ.

Гэхдээ эрх баригчдаа иргэд тэнэг биш болсон. "Ногоон автобус"-ны хэрэгт нэр холбогдсон Хотын сайд асан, УИХ-ын гишүүн Ж.Сүхбаатарыг бүрэн эрх, халдашгүй байдлынхаа татгалзаж, хариуцлага хүлээхийг шаардсан иргэд одоог хүртэл Төрийн ордны гадаа жагсаж байна. 

Дашрамд, одоогоор ногоон автобусны хэрэгт 25 хүн яллагдагчаар татагдан шалгагдаж буй. Энэ 25 дотор улстөрийн хариуцлага хүлээж түгжрэлийн сайд, хотын даргын албан тушаалаас буусан Ж.Сүхбаатар, Д.Сумъяабазар нар багтаж байгаа эсэх нь тодорхойгүй байсаар байна.