Хүний амь насыг онц хэрцгийгээр хөнөөсөн Б.Махбалыг хугацаанаас өмнө Ерөнхийлөгч асан Х.Баттулгын зарлигаар сулласан шийдвэрийг цуцалж, буцаан хорихоор шийдвэрлэлээ.

Одоогоос таван жилийн өмнө буюу 2018 оны наймдугаар сард Зам тээврийн хөгжлийн яамны байранд хүн амины хэрэг гарч, тус яамны Хяналт шинжилгээ, үнэлгээ дотоод аудитын газрын дарга Т.Гомбосүрэн онц ноцтойгоор амь хохирсон хэрэг гарсан. Энэхүү хэрэгт тус яамны Төрийн захиргаа, удирдлагын газрын дарга Б.Махбалыг сэжигтнээр татан, шалгаж гурван шатны шүүхээс 11 жилийн хорих ял оноож шийдвэрлэсэн байдаг.

Гэвч энэ оны есдүгээр сарын 27-ны өдөр хоригдол Б.Махбалыг 3 жил 1 сар 6 хоногийн хорих ялаас хугацаанаас өмнө суллах шийдвэрийг Багануур дүүргийн Эрүүгийн хэргийн анхан шатны шүүхээс гаргасан. Энэхүү шийдвэрийг Ерөхийлөгч асан Х.Баттулгын зарлигыг үндэслэн гаргасан юм. 

Шүүхийн энэ шийдвэрийг Багануур дүүргийн ерөнхий прокурор эсэргүүцэж давж заалдах шатны шүүхэд хандсан юм.

Энэ талаар Улсын Ерөнхий прокурорын газраас “Багануур дүүргийн прокурорын газрын ерөнхий прокурорын бичсэн "Иргэн Б.Махбалыг хорих ялаас хугацаанаас өмнө суллаж, хяналт тогтоож шийдвэрлэсэн Багануур дүүргийн Эрүүгийн хэргийн анхан шатны шүүхийн шүүгчийн 2023 оны 09 дүгээр сарын 13-ны өдрийн 2023/ХМШЗ/59 дугаартай захирамжийг хүчингүй болгох" эсэргүүцлийг Нийслэлийн эрүүгийн хэргийн давж заалдах шатны шүүх хүлээн авч, эсэргүүцлийг хангаж шийдвэрлэлээ” гэж мэдээллээ.