МАН-ын Удирдах Зөвлөл өнөөдөр хуралдаж, Нийслэлийн Засаг дарга бөгөөд Улаанбаатар хотын Захирагчаар Х.Нямбаатарыг томилохыг 100 хувь дэмжжээ. 

Шинэ Хотын дарга Х.Нямбаатар өөрийн байр суурийг илэрхийллээ.

Тэрээр "Монгол Улсын Ерөнхий сайдаас маш олон үүрэг чиглэл, даалгавар өнөөдөр авлаа. Нийслэл хотод 5Ш ажиллагааг эрчимжүүлэх, худалдан авалттай холбоотой ажиллагааг ил тод, нээлттэй болгох, газар олголт, барилга хот төлөвлөлттэй холбоотой харилцаануудыг бүхэлд нь цахимжуулах гэх мэтчилэн олон үүрэг даалгаврыг тэмдэглэж авсан.

Нийслэл бол маш олон асуудалтай их айл. Улаанбаатарын түгжрэл хамгийн дээд цэгтээ хүрчихсэн байна. Импортын автомашины хязгаарлалт огт хийгдэхгүй байгаа.

Нэг амиар олон автобус шинэчлэх гэсэн бодлого сая уначихлаа. Эдгээр худалдан авалттай холбоотой харилцааг эцэслэн дуусгах, нээлттэй сонгон шалгаруулалт зохион байгуулах ажлыг хийнэ. 

Аравдугаар сарын сүүлээс агаарын бохирдол ихэснэ. Энэ асуудлыг бууруулах зэрэг ажлууд байна.

Би өнөөдөр гурван цаг гаруй Ерөнхий сайдаас хоттой холбоотой бодлого, чиглэл авлаа. Миний хувьд ч, Б.Дэлгэрсайхан гишүүний хувьд ч ажилд томилогдъё гэдэг санаачилга гаргаагүй. Энэ бол цэвэр Засгийн газрын тэргүүний шийдвэр байсан. Иймээс хүндэтгэлтэй хүлээж авсан" гэлээ. 

Мөн тэрээр "Надаас өөр хувилбар байхгүй гэж хэлсэн. Мэдээж хотын даргаар томилогдсон тохиолдолд алсдаа хэрэгтэй шийдвэрийг гаргана гэж бодож байна.  Улаанбаатар хотод заримдаа автомашинууд тэг зогсдог асуудал бий. 

Өнөөдөр автомашинд импортын ямар нэгэн хязгаарлалт алга. Иймд алсдаа эм мэт тустай, ойрын үедээ давс мэт гашуун зарим шийдвэрийг гаргахаас өөр аргагүй нөхцөл байдалтай байгааг эртхэн хэлэх нь зүйтэй байх.

Сонгинохайрхан дүүргийн иргэдэд ажлын тайлангаа тавина. Би хол явахгүй. Тиймээс иргэдтэй уулзаж, асуудлыг нь шийдвэрлүүлнэ. Би сэтгэлгүй хүн биш. Намайг сонгосон иргэдтэйгээ болон тус дүүргийн Засаг даргатай нь хамтран ажилласаар байх болно. Нийслэлийн намын хороон дээр хэн нэгэнтэй зөрчилдсөн зүйл байхгүй. Хэн нэгэн хүний талаар хэвлэл мэдээллийн байгууллагад матаас өгч байсан удаагүй. Нам, улстөрийн хүчин дотооддоо эв нэгдэлтэй байх нь сонгуульд ялах хүч болдог. Гэхдээ энэ бол буруу зүйлийг нууж хаа гэсэн үг биш.