Нийслэлийн Засаг даргын 2023 оны А/1046 дугаар захирамж, НЗДТГ-ын Цэргийн штабын Сургалт бэлтгэлийн нэгдсэн төлөвлөгөөний дагуу цэргийн дүйцүүлэх албаны тусгай үүргийн бэлтгэл шатны сургалтыг есдүгээр сарын 18-наас аравдугаар сарын 2-нд зохион байгуулж байна. Сургалтыг Зэвсэгт хүчний 353 дугаар ангийн 323 дугаар салбар, Чингэлтэй дүүргийн Онцгой байдлын хэлтсийн аврах гал унтраах 10 дугаар анги, Баянзүрх дүүргийн Гал түймэр унтраах, аврах 63 дугаар анги гэсэн гурван хэсэгт бүсчилсэн хэлбэрээр хийж буй.

Тус сургалтыг цэргийн албыг биеэр дүйцүүлэн хааж байгаа иргэнд орон нутгийн хамгаалалтад оролцох, гамшгаас хамгаалах болон хүмүүнлэгийн үйл ажиллагаанд туслалцаа үзүүлэх, улсын болон орон нутгийн бүтээн байгуулалтад оролцох талаар шаардлагатай мэдлэг, дадлага эзэмшүүлж, хууль тогтоомжоор хүлээсэн томилгоот үүргээ биелүүлэх бэлтгэлийг олгох зорилгоор явуулж байгаа юм.