Төрийн ордны хойд талын цэцэрлэгийг иргэдэд нээлттэй болгохоор тохижуулж байгаа. Тохижилтын ажил дууссан, эрх бүхий байгууллагын шийдвэр гарсан тохиолдолд цэцэрлэгийг иргэдэд нээлттэй болгоход бэлэн гэдгийг Улаанбаатар хотын Захирагчийн ажлын албанаас мэдээлжээ.
УБЗАА-ны дугуйн ба явган замын тохижилтын хэлтсийн дарга Г.Билгүүн:
-"Төрийн ордны арын цэцэрлэгийн гэрэлтүүлэг, сандал хогийн сав, 2,000 м.кв талбайд явган хүний зам, талбайн тохижилтыг хийж дууссан. Иргэдэд зориулсан цэвэр усны системийн тоног төхөөрөмжийг угсарсан. Одоо гүний худагтай холбох ажил хийгдэж байна. Төрийн ордны ард гүний худаг байдгийг өнгөрсөн жил лайдаж, зассан. Цэвэр усны системээ уг худагтай холбосноор иргэд цэвэр ус уух, ногоон байгууламжийг услах боломжтой болох юм. Ногоон байгууламжийн хувьд зүлэг ногоо нь ургасан, ховор зүйлийн цэцэг тарьсан байдалтай байгаа.
Тохижилтын онцлогоос дурдвал Төрийн ордны арын хүндэтгэлийн талбайн чулуун шалыг ширмэл ширдгийг хүрэл цутгуураар жийжүүдэж хийсэн сийлбэртэй болгосон. Энэ нь үндэсний түүх, соёлоо харуулахыг хичээсэн юм. УБЗАА-наас уг цэцэрлэгийг иргэдэд нээлттэй болгоход татгалзах зүйл байхгүй. Төрийн тусгай хамгаалалттай газраас хашааг янзлах санал гаргаад байгаа" гэсэн байна.
