Оросын хувийн зэвсэгт хүчний Вагнер группийн үйл ажиллагаатай холбогдуулан тус улсад тогтворгүй байдал үүсэх эрсдэлтэй байгаа билээ. Үүнтэй холбоотойгоор ОХУ-д оршин сууж байгаа монгол иргэдийн аюулгүй байдлын талаар Гадаад Харилцааны Яамнаас дараах мэдээллийг өглөө.
Мэдээлэлд "Ростов, Воронеж орчимд 60 гаруй монгол оюутан суралцаж байгаа. Одоогоор нөхцөл байдал хэвийн, хичээл нь үргэлжилж байгаа бөгөөд оюутнууд зургаадугаар сарын сүүлээс зуны амралт эхлэхээр эх орондоо ирэхээр төлөвлөж байна. ГХЯ болон Москвад суугаа ЭСЯ-наас дээрх оюутнуудтайгаа тогтмол холбоотой байгаа" гэв.
Мөн Монгол Улсаас ОХУ-д суугаа ЭСЯ-наас иргэд, оюутнуудад хандан сонор сэрэмжтэй байхыг анхаарууллаа.
Тодруулбал "Үүсээд буй нөхцөл байдалтай холбогдуулан ОХУ-ын Терроризмтой тэмцэх үндэсний хороо мэдэгдэл хийж зургаадугаар сарын 24-ний өдрөөс эхлэн Москва, Воронеж, Ростов-на-Дону хотод терроризмын эсрэг тусгай ажиллагаа авч хэрэгжиж эхэлснийг зарлаж, олон нийтийн арга хэмжээг цуцлах шийдвэр гаргаад байна.
ОХУ-ын Ерөнхийлөгч мөн өдөр мэдэгдэл хийж “Вагнер”-ийн үйл ажиллагааг эх орноосоо урвасан явдал хэмээн онцолж, үүнийг таслан зогсоох чиглэлээр бүхий л үйл ажиллагааг авч хэрэгжүүлэхээ мэдэгдсэн.
Нөхцөл байдалтай холбогдуулан Монгол Улсаас ОХУ-д суугаа Элчин сайдын яам иргэддээ хандан сонор сэрэмжтэй байх, ОХУ-ын Белгород, Брянск, Воронеж, Краснодар, Липецк, Курск, Ростов, Орловск, Свердловск муж, мөн Москва, Санкт-Петербург зэрэг хот руу зайлшгүй шаардлагагүй тохиолдолд зорчихгүй байхыг зөвлөж байна" гэжээ.
Шаардлагатай тохиолдолд шуурхай холбоо барих утасны дугаар:
-
Элчин сайдын яам +74956906792
-
Консулын хэлтэс +74992411548
