Өнөөдрийн чуулганы нэгдсэн хуралдаанаар Соёлын бүтээлч үйлдвэрлэлийг дэмжих тухай хуулийн төслийг хэлэлцэхийг гишүүдийн олонх дэмжсэн тул анхны хэлэлцүүлэгт бэлтгүүлэхээр холбогдох байнгын хороонд шилжүүллээ. 

Хуулийн төсөлд соёлын бүтээлч үйлдвэрлэлийг хөгжүүлэх, импортыг орлох, экспортод чиглэсэн нэмүү өртөг шингэсэн бүтээгдэхүүн, үйлчилгээний өрсөлдөх чадварыг нэмэгдүүлэх, соёлын бүтээлч үйлдвэрлэлийг дэмжих хэлбэр, удирдлага зохион байгуулалтын эрх зүйн үндсийг тогтоохтой холбогдсон харилцааг зохицуулсан байна.

Уг хуулийн төсөл батлагдсанаар төрөөс үзүүлэх дэмжлэгийн хэлбэр тодорхой болж, соёлын бүтээгдэхүүн, үйлчилгээг бүтээх, түгээхтэй холбоотой үе шат бүрд бүртгэл, мэдээллийн тогтолцоо нэвтэрч, соёлын нийгэм, эдийн засгийн ач холбогдлыг хэмжих боломж бүрдэх аж. 

Энэ талаар Соёлын сайд Ч.Номин "Соёлын бүтээлч үйлдвэрлэлийн тухай хууль нь салбарын 4,000 гаруй хүний оролцоонд суурилж бий болсон хууль юм.  Оюуны өмчид бүртгэгдэж, хэрэглээнд ороход бэлэн болсон бүтээлийг хэрхэн эдийн засгийн эргэлтэд оруулах вэ гэдгийг тодорхой болгож байгаа" гэв. 

Үргэлжлүүлэн Төсвийн тухай хуульд нэмэлт оруулах тухай хууль болон хамт өргөн мэдүүлсэн хуулийн төслүүдийг хэлэлцэж, мөн анхны хэлэлцүүлэгт бэлтгүүлэхээр Төсвийн байнгын хороонд шилжүүлэв.

Төсвийн бодлогын 14 тухай хуульд нэмэлт оруулах тухай хуулийн төслийг нэр бүхий гишүүд өргөн барьжээ.