Сауна халуун ус, эрүүл мэндэд тустай, төдийгүй үрчлээс багасгаж арьс уян хатан, толигор болж илүүдэл жин багасдаг. Гэхдээ зарим тохиолдолд сауна, халуун ус хор хөнөөлтэй. Халуун устай  тэвшинд  суух нь  зүрх судасны системд хүчтэй нөлөөлдөг, агаарын хэмийн огцом өөрчлөлт цусны эргэлтийг сааруулж, өндөр хэмийн нөлөөгөөр өмнө нь "ажилладаггүй" байсан судсуудаар хүртэл цус гүйнэ. Харин усан санд үсэрч орох үед цусны судсууд агшдаг бас уснаас гарахад дахин тэлж, илүүдэл дулаан өгнө. Ийм замаар судсуудын "гимнастик" явагдана. Их хөлрөх үед цус өтгөрч, үүний зэрэгцээ тус системийн цусны бүлэгнэх чадвар буурдаг. Өөрөөр хэлбэл ваннад орох үед зүрх, цусны судсууд ба цус “байлдааны бэлэн байдалд" ордог. Иймээс зүрх, цусны эргэлтийн согогтой хүмүүс халуун  усанд орох нь эрсдэлтэй.

Мөн даралт ихдэх өвчтэй, даралт 200 мөнгөн усны баганаас илүү бол, зүрхний өвчин, судасны атеросклерозтой бол халуун усанд орох хориотой. Түүнээс гадна цус их алддаг, бүлэгнэл тромбоз үүсэх хандлагатай. Саяхан мэс засал хийлгэсэн бол ваннад орж болохгүй. 60-ээс дээш насны хүмүүс маш болгоомжтой орж болно. Харин 70 хүрсэн бол огт болохгүй.

Уушги, мөгөөрсөн хоолойн архаг өвчтэй, сүрьеэтэй, хүнд хэлбэрийн багтраатай хүмүүс халуун усанд орох хэрэггүй.

Даралт хүндэрсэн үед ууранд сууж болохгүй. Саунд орох үед бөөрний ачаалал багасдаг. Учир нь хөлс их ялгардаг, өөрөөр хэлбэл бөөр "түр амардаг". Гэхдээ шээсний замын өвчтэй, бөөрний хүнд хэлбэрийн өвчтэй бол орж болохгүй, эрсдэлтэй.

Саунд ороход элэг бас амардаг, дулааны нөлөөгөөр цөс ялгаралт сайжирч, цөсний зогсонгошсон хэсэг  гадагшилдаг. Гэдэсний ажиллагаа хэвийн болж, хортой бодисууд гадагшилдаг. Гэвч элэгний хүнд үрэвсэл, цирроз, тураал, шархлаа өвчин хурцдах үед халуун усанд орохыг хориглоно.

Арьсны өвчтэй, идээт тууралт, мөөгөнцөр, халуун өвчтэй үед мөн орж болохгүй. Чихрийн шижингийн хүнд хэлбэр, нойр булчирхайн өвчин, татдаг өвчин, нүдний даралт ихдэх өвчин, психоз, солио өвчинтэй бол мэдээж, халуун усанд орохыг хориглоно.

Халуурсан, хурц үрэвсэлт өвчин, хорт хавдартай хүн ууранд орж огт болохгүй. Иймээс саунад суухын өмнө заавал эмчтэй зөвлөх хэрэгтэй.