Ардчилсан намаас цаг үеийн асуудлаар мэдээлэл хийлээ.
Энэ үеэр АН-ын нарийн бичгийн дарга Ч.Өнөрбаяр "АН-ын 13-р ээлжит их хурал болсон. Энэ хурлаар 2022 оны хоёрдугаар сарын 9-ны өдөр Улсын дээд шүүгчдийн хуралдааны тогтоолд заасан үндэслэлүүдийг харгалзаж, тэнд заасан зөрчлүүдийг арилган, дүрмийн өөрчлөлтийг намын их хурлаараа батлаад өнөөдөр хүргүүлэх гэж байна.
Хоёрдугаарт, өнөөдөр Монголд төрийн нууц гэдэг ойлголт замаа алдлаа. Төрийн нууц гэдэг ойлголтыг дарга нар үзэмжээрээ шийддэг болчихлоо. Дарга нар өөрсдийнхөө хулгай, луйвар, ковидын үеийн төсвийн зарцуулалт, Хөгжлийн банкны зээл гэх мэт олон нийт, ард түмнээс нуухыг хүссэн бүхэндээ төрийн нууцын тамга, тэмдэг дардаг боллоо.
Нууцын зэрэгт оруулахын тулд тухайн баримт тодорхой шалгуур хангасан байх ёстой. Монгол Улсын үндэсний аюулгүй байдал, үндэсний язгуур ашиг сонирхолд аюул учруулахаар зүйл байвал төрийн нууцад хамруулдаг. Гэтэл өнөөдөр Хөгжлийн банкны зээлийн асуудал яагаад үндэсний аюулгүй байдалд хамаарчхаад байгаа юм бэ.
Цаашдаа төрийн нууцын асуудлаа цэгцлээч ээ. Монгол Улсын Ерөнхийлөгч Үндэсний аюулгүй байдлын зөвлөлийг тэргүүлдгийн хувьд төрийн нууцтай холбоотой асуудлыг нэг талд нь гаргаач ээ. Тагнуулын байгууллага ажлаа хийгээч ээ гэж хүсэж байна. Төрийн байгууллагууд дээр байгаа нууцын эрхлэгч гэх хүмүүс даргынхаа үзэмжээр нууцын тэмдгийг дараад байж болохгүй. Төр өөрөө нууцлах шаардлагагүй мэдээллүүдээ нууцаасаа гарга. Олон нийтэд нээлттэй хэлэлцэж, шүүн тунгаах эрхийг нь өг. Энэ бол ардчилсан нийгмийн нэг зарчим. Үүн дээр ерөнхийлөгч санаачилга гаргаж, нууцтай холбоотой асуудалд ажлын хэсэг гаргаасай гэж хүсэж байна" гэлээ.
