"Эрдэнэт үйлдвэр" ТӨҮГ-ын хөрөнгөөр Орхон аймагт байгуулсан "Эрдэнэт Медипас" эмнэлгийн хувьчлалын цуцалсан асуудлаар Шадар сайд С.Амарсайхан  мэдээлэл хийв.

С.Амарсайхан: 

-"Эрдэнэт" үйлдвэрийн хөрөнгөөр 2013 онд 69.5 тэрбум төгрөгөөр барьсан "Эрдэнэт медипас" эмнэлэг болон 50 айлын орон сууц, 24 автомашины зогсоол, эмнэлгийн тоног төхөөрөмж бүхий төрийн өмчийг хууль бусаар тухайн үеийн "Эрдэнэт" үйлдвэрийн удирдлагууд нэг ч төгрөгийн төлбөргүйгээр хувьчилсан байдаг. Энэ асуудлаар Засгийн газарт танилцуулж, Ерөнхий сайд үүрэг даалгавар өгсөн. Тус эмнэлгийг төрийн мэдэлд авч, "Эрдэнэт" үйлдвэрийн өмчид авч Эрүүл мэндийн яаманд шилжүүлж, бүс нутгийн эмчилгээ оношлогооны төв болгох шийдвэрийг гаргалаа.

Засгийн газрын ээлжит хуралдаанаар Засгийн газрын тэргүүнд танилцуулсан. Эмнэлгийн барилга байгууламжийг ойрын хугацаанд хүлээж авна. Бэлтгэл ажлыг Төрийн өмчийн бодлого зохицуулалтын газар хийж байгаа. Эмнэлгийн барилгыг үнэгүй хувьчилж аваад зогсохгүй, 2016-2020 оны хооронд "Эрдэнэт" үйлдвэрээс 12.7 тэрбум төгрөгийг үзлэг хяналт хийх нэрээр эмнэлэг авсан байдаг. Буцаагаад 6.6 тэрбум төгрөгийг эмнэлгийн төлбөрөө гээд "Эрдэнэт" үйлдвэр рүү шилжүүлсэн. Төрийн өмчийг үнэгүй авчихаад дахин бэлэн мөнгөөр хуйвалдаж, их хэмжээний хөрөнгө авдаг асуудал гарсан байна. Өнгөрсөн хугацаанд хувьчилж авсан байгууллагад шаардлага хүргүүлэхэд 30 сая орчим ам.долларын нөхөн төлбөр өг гэдэг хариу өгсөн. "Эрдэнэт" үйлдвэрийн тухайн үеийн захирал Ц.Даваацэрэн хүнд эрүүгийн хэрэг үүсгэж, АТГ-т шалгаж байгаа. Хууль хяналтын байгууллага үйл ажиллагаагаа үргэлжлүүлнэ. Харин төр өмчөө авах асуудал тусдаа шийдэгдэнэ"  гэв.

Мөн тус эмнэлгийн хувьд "УИХ болон Засгийн газраас баталсан төрийн өмчийн хувьчлалын жагсаалтад ороогүй, Төрийн өмчийн бодлого зохицуулалтын газраас хувьчлах зөвшөөрөл гараагүй. Эмнэлэг хувьчлагдах үед "Эрдэнэт" үйлдвэр хамтарсан үйлдвэр байсан. Үйлдвэрийн өмчийг хувьчлах тухай ТУЗ-ийн шийдвэр гараагүй. Үндсэндээ хууль ёсны шийдвэргүйгээр хууль бусаар өмчилж авсан асуудал. Тийм учраас шүүхийн процесс байхгүй гэж үзэж байна. Тухайн үеийн ханшаар 69.5 тэрбум төгрөгийн өмч хөрөнгийг 50 айлын орон сууцтай авсан. Энэ бол луйвар" хэмээн мэдэгдэв.