УИХ-ын ээлжит бус чуулганы хуралдаанаар Монгол Улсын 2022 оны төсвийн тухай хуульд нэмэлт, өөрчлөлт оруулах тухай, Нийгмийн даатгалын сангийн 2022 оны төсвийн тухай хуульд өөрчлөлт оруулах тухай хуулийн анхны хэлэлцүүлгийг хийж байна. 

Засгийн газраас өргөн мэдүүлсэн хуулийн төслийг Ерөнхий сайд Л.Оюун-Эрдэнэ танилцуулахдаа, "Ерөнхийлөгчийн өгсөн чиглэл, Засгийн газрын мөрийн хөтөлбөрийг үндэслэн Монгол Улсын төсвийг тодотголыг УИХ-д өргөн барьлаа. Төсвийн тодотголын хүрээнд бүрэн тэтгэврийн доод хэмжээг 500 мянган төгрөг хүртэл өсгөж, 500 мянган төгрөгөөс дээш тэтгэврийн мөнгийг 15 хувиар нэмэгдүүлэх болон өргөн хэрэглээний бараа бүтээгдэхүүний үнийг тогтворжуулахтай холбогдуулан зарим багц арга хэмжээг тусгалаа" гэсэн юм. 

Энэ үеэр хэлэлцэж буй асуудалтай холбогдуулан УИХ-ын гишүүн С.Одонтуяа байр сууриа илэрхийллээ.

Тэрээр "Ахмадууд маань сар шинийг сайхан мэдээтэй угтаж байна. Тэтгэвэр тэтгэмжийг нэмэх асуудлыг дэмжиж байгаа. Монгол улсын Ерөнхийлөгчөөс цаг үеээ мэдэрч санал оруулж ирж байгаад баярлалаа. Би УИХ-ын гишүүдээсээ ичиж байна. Өмнө нь төсвийг хэлэлцэх үеэр тэтгэврийн асуудлыг нухацтай ярилцах цаг хангалттай байсан. Сонгогчдын төлөөлөл болоод манлайлах чадваргүй УИХ-ын гишүүдтэй болсон байна. Ахмадууд тэтгэврийн мөнгөөрөө амьдрахад хэцүү байна. Та нар энэ мөнгөөр амьдраад үз гээд зөндөө ярьсан. Өнгөрсөн 12 дугаар сард төсөв хэлэлцэж байхад тэтгэвэр нэмээд өгөөч гэсэн. Б.Пүрэвдорж бид хоёрыг попорлоо гээд шоолж ч байсан. Тэтгэврийг багц хуулиар шийднэ гээд хэлэлцээгүй. Заавал Ерөнхийлөгч чиглэл өгч байж ажилладаг баймааргүй байна. УИХ-ын гишүүд өөрсдөө иргэдийнхээ төлөө манлайлал үзүүлдэг байх ёстой. Ийм байж болохгүй" гэлээ.