Сар шинийн баяр дөхсөнтэй холбогдуулан УИХ-ын зарим гишүүд ахмадуудыг цуглуулан хэвийн боов болон гурил, бусад хүнсний багцийг тарааж буй зураг, бичлэгийг цахим орчинд байршуулсан юм. Энэ мэт гишүүдийн увайгүй үйлдлүүд иргэдийн бухимдлыг нилээдгүй их төрүүлсээр байна. 

Тэгвэл өнөөдөр УИХ-ын гишүүн С.Одонтуяа, УИХ-ын гишүүн Т.Доржханд нар сонгуулийн хуулинд нэмэлт өөрчлөлт оруулах хуулийн төсөл санаачилж өргөн барих талаараа мэдээлэл хийлээ.

УИХ-ын гишүүн Т.Доржханд "Хэвийн боов, бэлгийн зүйл тарааж, санал худалдаж авдаг энэ зүйл хавтгайрлаа. Хоёрхон сарын өмнө Монгол Улсын 2022 оны төсөв батлагдсан. Төсөв дээр үр ашиггүй зардал, хавтгайрсан халамжийн бодлого хэвээрээ байна. Манай улсын иргэдийн гурван хүн тутмын хоёр нь ажилгүй байхад цементэн хөшөө барьдаг, цагаан сараар иргэддээ хэвийн боов, гурил тараадаг байдлыг хязгаарлахгүй бол болохгүй. Бодлого буруу байна.

УИХ-ын сонгуулийн тухай хуулийн 48.1-т ээлжит сонгуулийн жил эхэлснээс хойш санал авах өдрийн дуусталх хугацаанд ямар нэгэн эд бэлгийн зүйл тарааж болохгүй гэсэн зохицуулалт байдаг. Одоогийн хуулиар бол та юм тарааж болно гэсэн зохицуулалт байгаа юм. Тиймээс хуулийн хязгаарлалт хийх хэрэгтэй.

Хэрвээ та УИХ-ын гишүүн болсон бол дөрвөн жилийн хугацаанд ямар нэгэн эд бэлгийн зүйл тараахгүй гэж хуульчлах хэрэгтэй. Хэрвээ ингэсэн тохиолдолд та дахин сонгогдох эрхгүй болох бөгөөд эрүүгийн хариуцлага хүлээнэ гэсэн ерөнхий зохицуулалтыг хуульд оруулахаар санал болгож байгаа. Энэ заалт нь зөвхөн УИХ-ын гишүүд биш, шат шатны сонгогддог албан тушаалтнуудад хамаатай байна. Мөн Ерөнхийлөгчийн сонгуулийн хуульд энэ агуулга хамаарна.

Шат шатны сонгуульт албан тушаалтнууд дөрөв, зургаа жилийн хугацаанд иргэдээс санал авах зорилгоор ямар нэгэн эд, бэлгийн зүйл тараахгүй гэдэг зохицуулалтыг хуульд оруулах саналаа нэгтгээд хаврын чуулганд оруулах болно.

Иргэд зарим УИХ-ын гишүүдийг буруутгаад байна. Яагаад ийм зүйл болоод байна вэ гээд тухайн бэлгийг тарааж байгаа гишүүдтэй холбогдоход систем нь ийм байхад яах юм бэ гэдэг хариулт өгч байгаа" гэлээ. 

Харин УИХ-ын гишүүн С.Одонтуяа "УИХ-ын гишүүн бодлогоо тараах ёстой болохоос бэлэг тараадаг байж таарахгүй, хуулиар хориглохгүй бол алсдаа мөнгөний уралдаан болно. Нэг удаагийн бэлэг тараахаас илүү аймаг, нийслэл, дүүргийг нийтэд нь яаж хөгжүүлэх вэ гэдэгт илүү анхаарах хэрэгтэй байна. Ер нь бэлэг тараах нь сөрөг үр дагавартай. Мөнгөний уралдаан болдог. Ялангуяа эмэгтэйчүүд, залуучууд улс төрд ороход маш их саад болж байгаа.

Тиймээс УИХ-ын Сонгуулийг хуулийг боловсронгуй болгоход шийдэл гаргаж ажиллах ёстой. Утаа, хөрсний бохирдол, түгжрэлээ шийдмээр байна. Татварын орчныг улам таатай болгож, өрхийн бизнесийг дэмждэг, хавдрын эсрэг үйл ажиллагааг эрчимжүүлж, эмнэлэг, сургуулиа бариач гэсэн зүйлийг иргэд ихээр ярьж байна.

Сонгогчдын боловсрол дээшлээд байхад улстөрчид шийдэл гаргахгүй байж болохгүй. Тиймээс бидний зүгээс шийдлийг санал болгож байна. УИХ-ын гишүүдийн хэрэгжүүлж буй ажлуудаас иргэдийн сэтгэлд нийцэж, дэмжлэг авч буй олон төсөл, хөтөлбөр бий" гэлээ.