Нийслэлийн Засаг дарга асан Э.Бат-Үүлд анхан шатны шүүхээс дөрвөн жилийн хорих ял оноож, нийтийн албанд томилогдох эрхийг гурван жилээр хасч шийдвэрлэснээс хойш 40 дэх хоногтойгоо золгож байна. Шүүхийн шийдвэр гарсан орой Э.Бат-Үүлийн өмгөөлөгч болон хүү Чулуудай нар "Улс төрийн зорилгоор хилсээр яллалаа. Давж заалдана" гэдгээ мэдэгдсэн. Гэвч Чингэлтэй дүүргийн эрүүгийн хэргийн шүүх, тодруулбал шүүх хуралдааны даргалагч шүүгч Б.Халиун шүүгдэгч нарт шүүхийн тогтоолыг бичгээр гардуулж өгөөгүйн улмаас Э.Бат-Үүлийн өмгөөлөгч болон түүний гэр бүлийнхэн шүүхийн шийдвэрийг давж заалдах эрхээ эдэлж чадахгүй сар гаруйн хугацаа өнгөрөөд байгаа билээ. 

Шүүгч Б.Халиун өнгөрөгч 16-нд "ковид туссан" гэдгээ дүүргийн шүүхэд мэдээлсэн бол Чингэлтэй дүүргийн Эрүүгийн хэргийн шүүх өчигдөр буюу 24-ний өдрөөс ирэх сарын 1-нийг хүртэл  "халдвар гарсан" шалтгаанаар хөл хорио тогтоогоод байгаа. Хөл хорио дууссаны маргааш сар шинийн амралтын өдрүүд эхэлж байгаа тул ирэх сарын 7-ны өдөр хүртэл тус шүүх ажиллахгүй. Тэгэхээр Э.Бат-Үүлийн шүүхийн тогтоол хүлээх хугацаа дахиад 14 хоногоор суналаа гэсэн үг. Дээр нь прокурор болон хорих ангийн удирдлагын зүгээс Э.Бат-Үүлийн хэвлэн нийтлэх эрхийг хасаад сарын хугацаа өнгөрч байна.

Энэ талаар өчигдөр Ерөнхий сайд асан С.Баяр цахим хуудсаар дамжуулан хувийн байр сууриа илэрхийлжээ. Тэр энэ тухай "Үүл шоронд хэвээрээ. Цагаан сараар хар гэрт сууж байх шиг гунигтай юм үгүй. Дээр нь үг хэлэх, нийтлэх эрхийг нь хасч. Оросын шоронд хоригдож буй Навальный хүртэл "Тайм" сэтгүүлд ярилцлага өгч болоод байна. Манайх чинь ардчиллын индекс энэ тэрээрээ ОХУ-ын урд нь алхдаг биш билүү" хэмээн жиргэсэн байна.