Хотын дарга асан Э.Бат-Үүлд Чингэлтэй дүүргийн эрүүгийн хэргийн анхан шатны шүүхээс дөрвөн жилийн ял оноож, нийтийн албанд томилогдох эрхийг нь гурван жилээр хассан. Өнгөрөгч сарын 16-нд гарсан шүүхийн шийдвэрийг анхан шатны шүүх 14 хоногийн дотор тогтоол хэлбэрээр шүүгдэгч нар, түүний өмгөөлөгчид гардуулж өгөх ёстой ч энэ ажил одоо хүртэл хийгдээгүй хэвээр байна. Шүүхийн шийдвэр гарсны дараа Э.Бат-Үүлийн өмгөөлөгч болон болон түүний гэр бүлийнхэн "хийгээгүй хэрэгт хилсээр ял хүлээлгэлээ" шүүхийн шийдвэрийг эсэргүүцэж, давж заалдана гэдгээ мэдэгдсэн билээ. Гэвч анхан шатны шүүхийн шийдвэр тогтоол болж гараагүй, шүүгдэгч нарын гар дээр ирээгүй байхад давж заалдах шатанд өргөдөл гаргах боломжгүй юм.
Тиймээс шүүхийн тогтоол яагаад хугацаандаа гарахгүй байгаа талаар тодруулахад дүүргийн шүүх “Шүүгч /шүүх хуралдаан даргалагч/ ковид туссан учир ажилдаа ирэхгүй байгаа” гэсэн байна. Гэтэл шүүгч халдвар авсан тухайгаа мэдэгдсэн нь өнөөдрөөс найм хоногийн өмнө буюу нэгдүгээр сарын 16. Тэр болтол 30 хоногийн хугацаанд шүүхийн тогтоолыг бичих хугацаа шүүгч Б.Халиунд байсан уу? Шүүгч шүүхийн тогтоолыг хугацаанд нь гаргахгүй байгаа нь шүүгдэгчийн давж заалдах эрхийг санаатай хясан боогдуулж байгаа хэрэг мөн үү?
Тийм гэдгийн бас нэг нотолгоо нь Чингэлтэй дүүргийн эрүүгийн хэргийн анхан шатны шүүх “Ковидын халдвар гарсан” шалтгаанаар өнөөдрөөс эхлэн ирэх сарын 1-нийг дуустал долоо хоногийн хугацаатай хөл хорио тогтоожээ. Хөл хорио дуусангуут сарын шинийн баярын амралт эхэлж, дахиад долоо хоног үргэлжилнэ. Тэгэхээр Э.Бат-үүлд оногдуулсан шүүхийн тогтооллыг хэргийн холбогдогч нарт гардуулах, улмаар олон нийтэд ил болгох хүртэл дахиад 14 хоногоор хойшилж байгаа юм байна. Магадгүй цагаан сарын дараа өөр нэг шүүгч ковид авч, дүүргийн шүүх дахиад хөл хорио тогтоож... гээд хэр удаан үргэлжлэхийг хэн мэдлээ.
