УИХ-ын Намрын ээлжит чуулганы отгон хуралдаанаар гурван улсад суух Элчин сайдыг томиллоо.

Ингэснээр Монгол Улсын дипломат алба түүхэндээ анх удаа хамгийн олон буюу зургаан эмэгтэй Элчин сайдтай болоод байна.  

Энэ талаар Гадаад харилцааны сайд Б.Батцэцэг өөрийн цахим хуудаснаа ийн бичжээ.

Тэрээр "Элчин сайд нарын томилгоог төрийн албаны мерит зарчмаар явуулах, мэргэжлийн болгох тал дээр илүү их анхаарч ажиллаж байна. Энэ удаа томилогдож байгаа Элчин сайдууд гадаад харилцааны өндөр мэдлэг, туршлагатай, салбартаа танигдсан, мэргэжлийн дипломатууд юм.

Бас нэг онцлох зүйл нь орчин цагийн дипломат албаны түүхэнд эмэгтэй Элчин сайд нар томилогдох нь маш ховор. Энэ удаа нийт 31 Элчин сайд нараас зургаан эмэгтэй Элчин сайд нэгэн үед алба хаах болж байна. Ингэснээр хүйсийн харьцааны өндөр ялгамжтай байсан энэ албанд эмэгтэйчүүд хүч түрэн орж ирэхийн хамт, эмэгтэйчүүдийн манлайллын асуудал гадаад харилцаанд биеллээ олж байгаад их баяртай байна" хэмээн бичжээ. 

Ийнхүү өмнөх Ерөнхийлөгчийн үед царцаагдаад байсан Элчин сайд нарын томилгоог шуурхайлан 23 Элчин сайдыг яаралтай горимоор томиллоо.

Мөн чуулганы хуралдааны үеэр гишүүд Элчин сайд нарыг ажлын хариуцлага алдвал эгүүлэн татаж болдгийн жишээ хэмээн онцолж байв.  

Хамгийн сүүлийн жишээ гэхэд монголчууд хамгийн олноороо оршин сууж, хамгийн ихээр зорчдог Солонгос улсад 13 настай монгол охиныг дээд ангийнх нь дөрвөн солонгос охин бүлэглэн зодсон хэргээс улбаалан БНСУ-д суух Элчин сайдад хариуцлага тооцож, эгүүлэн татсан билээ.

Өчигдөрийн хуралдаанаар,

1. Монгол Улсаас Бүгд Найрамдах Солонгос Улсад суух Онц бөгөөд Бүрэн эрхт Элчин сайдаар Эрдэнэцогтын Сарантогосыг;

2. Монгол Улсаас Кувейт Улсад суух Онц бөгөөд Бүрэн эрхт Элчин сайдаар Пүрэвийн Сэргэлэнг;

3. Монгол Улсаас Швейцарын Холбооны Улсад суух Онц бөгөөд Бүрэн эрхт Элчин сайдаар Даваасүрэнгийн Гэрэлмаа нарыг тус тус томиллоо.

Үүний өмнө,

1. Монгол Улсаас Бүгд Найрамдах Итали Улсад суух Элчин сайд Ц.Нарантунгалаг 

2. Монгол Улсаас Бразил улсад болон Чили улсад хавсран суух Элчин сайд Ш.Батцэцэг

3. Монгол Улсаас Бүгд Найрамдах Болгар Улсад суух Онц бөгөөд Бүрэн эрхт Элчин сайд Л.Саянаа

4. Монгол Улсаас Бүгд Найрамдах Франц Улсад суух Онц бөгөөд Бүрэн эрхт Элчин сайд У.Нямхүү нарыг томилоод байсан юм.