УИХ-ын гишүүн О.Цогтгэрэл, Ц.Туваан, Н.Алтанхуяг, Н.Ганибал, С.Ганбаатар нар өнөөдөр УИХ-ын дарга Г.Занданшатарыг Үндсэн хуулийн Цэцэд өгч байгаагаа мэдэгдлээ.

Хэвлэлийн хурлын үеэр УИХ-ын гишүүн Н.Алтанхуяг "Ардчилсан нам бол тэргүүн нам. Манай Монголын нийгэм 90 оноос хойшоо ялзарсан. Олон намыг устгах, ганцаараа дарангуйлах Назарбеавын хойноос явж байна. Назарбаевын хойноос явах зохион байгуулалттай үйл ажиллагаа өнгөрсөн жилийн 12 сараас эхэлж явлаа. Ардын намынхан Ерөнхийлөгчийн сонгуулийг яаж өөрийн болгох зөвлөгөө гадаадынхнаас авч хэрэгжүүлсэн. Монголд байгаа олон намын тогтолцоог устгах Х.Баттулгыг ерөнхийлөгчид нэр дэвшихгүй байлгах зөвлөгөөг гаднынхнаас авсан. Нэг намын дарангуйлал тогтоохын тулд АН-ыг хоёр тамга тэмдэгтэй болгож харагдуулж байна. Энэ нь бичигдсэн зохиолын дагуу явагдаж байна. Хуучин Ц.Элбэгдорж зохиол бичдэг байлаа. Одоо МАН-ынхан бичиж байна" гэв. 

Харин УИХ-ын гишүүн О.Цогтгэрэл "Үйл аижллагаагаа нэгтгэн зохицуулж байж бүлгийн үйл ажиллагаа амжилттай явагдах ёстой. Энэ чиглэлд АН-ын бүлгийн дарга, дотоод зохион байгуулалт дээр асуудал гараад энэ асуудлаа УИХ-ын дарга, холбогдох албан тушаалтнуудад тавьсаар ирсэн. Намрын чуулган өнөөдөр хааж байна. Өнгөрсөн долоо хоногт энэ асуудлыг шаардсан. Заавал УИХ-ын даргыг ҮХЦ-д өгөөд яах вэ, ойлголцоод шийдчихье гэж хүлээсэн. Тиймээс дахин, дахин шаардсан. Бид одооноос Г.Занданшатар даргыг Цэцэд өгөх гэж байна.

Нэгдүгээрт, Г.Занданшатар хуулиа биелүүлэх ёстой. Хоёрдугаарт, Г.Занданшатар даргыг Ардчиллыг тээгч, хамгаалагч түшээ гэж хүндэтгэдэг. Гэтэл Г.Занданшатар эс үйлдлээрээ парламентыг, сөрөг хүчнээ бэхчүүлэхэд хойш сууж буйд харамсаж байна. Хамгийн гол зүйл нь парламентын ардчилал. Хоёр намын бүлэг нэгнээ чадавхгүйжүүлж байгаа нь жижигхэн эрх ашиг. Тиймээс бид Г.Занданшатар даргын асуудлаар цэцэд хандаж байна” гэлээ.