Өнгөрөгч даваа гаригт АН-ын бүлгийн зарим гишүүд, АН-ын Онц их хурлаас намын даргаар сонгогдсон О.Цогтгэрэл нар УДШ-ийн шийдвэртэй холбоотой асуудлаар мэдээлэл хийсэн билээ. Тодруулбал,  "УДШ-ээс О.Цогтгэрэлийг намын даргаар бүртгээгүй болж Онц их хурлын шийдвэрийг хүлээн зөвшөөрсөн" гэх утгатай мэдээллийг хийсэн юм. Мөн УИХ-ын гишүүн Д.Ганбатыг УИХ дахь намын бүлгийн даргаас чөлөөлсөн тухай мэдээлсэн. Энэ асуудлаар өнөөдөр АН-ын тамгатай ганц дарга С.Эрдэнэ, УИХ дахь намын бүлгийн дарга Д.Ганбат нар эсрэг мэдэгдэл хийлээ. 

АН-ын дарга С.Эрдэнэ: 

-Өнгөрөгч арванхоёрдугаар сарын 20-нд УДШ-ийн нийт шүүгчийн хуралдаанаас АН-ын бүртгэлд өөрчлөлт оруулах, О.Цогтгэрэлийг АН-ын даргаар бүртгэхээс татгалзсан. Үүнтэй холбоотойгоор УДШ-ийн шийдвэрийг мушгин тайлбарлах асуудал гарч байна. 

УИХ дахь АН-ын бүлгийн бүтэц зохион байгуулалтад улс төрийн нөхцөл байдал хэвийн болтол ямар нэг хөдөлгөөн хийхгүй байх чиглэлийг өгч байгаа. Ардчилсан намаас төрийн өндөр албан тушаалд сонгогдон ажиллаж байсан, ажиллаж байгаа гишүүдтэй холбоотой олон ээдрээтэй асуудал нийгэмд яригддаг. Олон нийтийн дунд илт мэдэгдэж байгаа ийм асуудлыг хуулийн байгууллага шалгадаггүй.  Тиймээс гэмт хэрэгт холбогдсон байх магадлалтай намын нэр бүхий гишүүдийг хамтарсан ажлын хэсэг гарч хууль хяналтын байгууллага болон дотоод хяналтын байгууллагаар шалгуулна. Гэм буруутай бол хуулийн хариуцлага хүлээлгэх, гэм буруугүй бол нэр төрийг нь сэргээнэ. 

АН-ын үйл ажиллагаатай холбоотой аливаа мэдээллийг мөн шалгуулна. Удахгүй хуралдах АН-ын ҮБХ-гоор энэ асуудлыг хэлэлцэж, тогтоол болгон гаргана.

УИХ дахь АН-ын бүлгийн дарга Д.Ганбат:

-УИХ-ын чуулган дээр ерөнхий прокурор шударга ёсыг энэ танхимаас эхлүүлье гэж хэлж байсан. Долоо хоногийн дараа тэр хүнийг сольсон. Төрийн ордны гурван давхраас хэнд ял өгөх даалгавраа аваад явж байна гэж Хууль зүйн сайд Х.Нямбаатар чуулганы танхимд мөн зарлаж байсан. Тэд АН-ыг бас самарч байна. Тиймээс өнөөдөр олонх байгаа хүмүүсийг буусных нь дараа шалгуулна.