Донорын тухай хуульд нэмэлт, өөрчлөлт оруулах тухай хуулийн төслийн хэлэлцүүлэг өнөөдөр болж, салбарынханд хуулийн төслийг танилцуулав.

Энэ үеэр хуулийн төслийг санаачлахаар ажиллаж буй УИХ-ын гишүүн Ж.Чинбүрэн “Бид эрүүл мэндийн салбарын эрх зүйн шинэчлэлийг уг сууриар нь хийх шаардлагатай байна. Өнгөрсөн хугацаанд эрүүл мэндийн даатгалын санхүүжилтийн шинэчлэлийг хуульчлан баталж, хэрэгжүүлж буй ч цаашдаа сайжруулах зүйл нэлээдгүй гарч байна. Төрийн эрх барих дээд байгууллагад эрүүл мэндийн салбарын төлөөлөл болсон эмч гишүүд сонгогдож, санаачлагаараа нэгдэн Ардын эрүүл мэндийг дэмжих лобби бүлгийг байгуулан ажиллаж байгаа.

Мөн Эрүүл мэндийн сайд, дэд сайд, Төрийн нарийн бичгийн дарга нар практикт ажиллаж байсан мэргэжлийн эмчийн хувьд эрүүл мэндийн салбарын хууль тогтоомжийг сайжруулж, шинэчлэлээ улам илүү хурдтайгаар хэрэгжүүлээсэй гэж энэ салбарт ажиллаж буй 50 гаруй мянган эмч, ажилтнууд биднээс хүсэж, хүлээж, харж байгаа. Иймд Монгол Улсын Их Хурал, Засгийн газар, Эрүүл мэндийн яам атгасан гар шиг уялдаатай ажиллаж, эрүүл мэндийн салбарын эрх зүйн шинэчлэлийг түргэвчлэх шаардлагатай байна.

Өнөөдөр Донорын тухай хуульд нэмэлт, өөрчлөлт оруулах тухай хуулийн төслийн хэрэгцээ, шаардлагын талаар хэлэлцэж буй маань энэ бүхний эхлэл гэж би хувьдаа ойлгож байна” гэлээ.

Тэрээр мөн “Монгол Улсын хууль тогтоомжийг 2024 он хүртэл боловсронгуй болгох үндсэн чиглэлд тусгаснаар 2021 онд Эх, хүүхдийн эрүүл мэндийн тухай хуулийн төсөл, Донорын тухай хуульд нэмэлт, өөрчлөлт оруулах хуулийн төслүүдийг өргөн мэдүүлнэ. Мөн 2022 онд Эрхтэн, эд, эс шилжүүлэн суулгах тухай, Нийгмийн эрүүл мэндийн тусламж үйлчилгээний тухай, Эрүүл мэндийн хуульд нэмэлт, өөрчлөлт оруулах тухай хуулийн төслүүдийг, 2023 онд Хүний генетикийн тухай хуулийн төслийг өргөн мэдүүлэх ёстой” гээд Засгийн газрын мөрийн хөтөлбөрт эрүүл мэндийн ажилтны эрх зүйн шинэчлэл, нийгмийн хамгааллыг дэмжих хууль эрх зүйн орчныг бүрдүүлэх, өрхийн эрүүл мэндийн төвийн статусыг тодорхой болгох зэрэг асуудлуудыг тусгасан талаар мэдээлэл өгөв.

Түүнчлэн 2021, 2022 онд Засгийн газраас өргөн мэдүүлэх хуулийн төслүүдийн олон улсын практик, хууль эрх зүйн орчны судалгааг УИХ-ын Тамгын газрын дэргэдэх Парламентын судалгааны хүрээнгээр гүйцэтгүүлсэн талаараа дурьдлаа.  “Эрүүл мэндийн ажилтны цалин хөлсний систем, олон улсын туршлага”, “Телемедицин үйлчилгээний эрх зүйн зохицуулалт, олон улсын туршлага”, “Донорын насны байдал, ар гэрт үзүүлэх тусламж дэмжлэг”, “Эм, эмнэлгийн хэрэгслийн эрх зүйн зохицуулалт”, “Нийгмийн эрүүл мэндийн тусламж үйлчилгээний эрх зүйн зохицуулалт”, “Эмчлүүлэгчийн эрхийн зохицуулалт, олон улсын зөвлөмж”, “Эмч, эмнэлгийн мэргэжилтний эрх зүйн байдал” зэрэг олон улсын хэмжээний судалгаануудыг хийлгэсэн байна.

Тэрээр эмч мэргэжилтэй Улсын Их Хурлын гишүүний хувьд Улсын Их Хурлаар хэлэлцэж буй эрүүл мэндийн салбарын чиглэлээрх хууль тогтоомжуудын төслүүдийг хэлэлцүүлэгт бэлтгэх үүрэг бүхий ажлын хэсгүүдийг ахлан ажиллаж байгаа юм. Тухайлбал, Эм, эмнэлгийн хэрэглэгдэхүүний тухай хуулийн төсөл, Монгол хүний удмын сангийн аюулгүй байдлыг хамгаалах, хүн амын өсөлтийг дэмжих арга хэмжээний талаар авах арга хэмжээний тухай” Улсын Их Хурлын тогтоолын төсөл болон  Дархлаажуулалтын тухай хуулийн хэрэгжилтэд хяналт тавих УИХ-аас байгуулагдсан ажлын хэсэг, Инновац, цахим бодлогын байнгын хорооноос байгуулсан  Эрүүл мэндийн салбарт цахим шилжилт хийх ажлын хэсгүүдийг ахлан эрх зүйн зохицуулалтыг боловсронгуй болгохоор ажиллаж байна.