УИХ-ын гишүүн Г.Дамдинням Олимп, Дэлхийн тэмцээн уралдаанд өндөр амжилт гаргасан тамирчдад олгодог мөнгөн урамшууллын тогтолцоог эргэж харах цаг нь болсон хэмээн өөрийн байр сууриа илэрхийлээд байгаа билээ.

Өнөөдрийн байдлаар улсын хэмжээнд 52 тамирчинд жил бүр төсвөөс 1.5 тэрбум төгрөг олгож байгаа бөгөөд энэ цаашид өсөх аж.

Энэ талаар УИХ-ын гишүүн, БСШУС-ын Байнгын хорооны дарга Г.Дамдинням “Өнгөрсөн хаврын чуулганы төгсгөл үеэр буюу долдугаар сард Байнгын хороогоор Биеийн тамир спортын тухай хуулийн хэрэгжилтийг шалгах ажлын хэсгийн тайлан сонсох үеэр мөнгөн урамшууллын тогтолцоог эргэж харах хэрэгтэй гэж байр сууриа илэрхийлж байсан юм. Энэ яриа маань одоо нийтийн анхааралд ороод байх шиг байна.

УИХ-ын БСШУС-ын Байнгын хорооноос гаргасан тайланг хэлэлцэх үед “дараагийн олимпын циклд тамирчдаа бэлтгэх, үүнд бэлтгэхийн тулд ЕБС-иудын биеийн тамирын тоног төхөөрөмжийг сайжруулах” асуудлууд яригдсан. Мөн спортын хороодын өмч хөрөнгө, газрын маргаантай асуудлууд ч байдаг. Үүнтэй холбоотой асуудлуудыг нэг мөр шийдье гэсэн зорилготой манай Байнгын хорооны олон заалттай тогтоол гарсан юм. Үүний нэгд Засгийн газрын журмаар олгодог тив, дэлхийд өндөр амжилт гаргасан тамирчдын мөнгөн урамшуулал олгодог хурцаар яригдсан. Манай Байнгын хорооны гишүүд ижил байр суурь илэрхийлсэн.

Нэгдүгээрт, энэ бол цалин. Энэ тамирчид нийгэмд соён гэгээрүүлэх, хүүхэд залуучуудыг зөв хүмүүжүүлэх, төвөлших, зөв үлгэрлэх ажлыг хийгээрэй гэж олгож буй цалин юм. Түүнээс биш зүгээр сууж байгаад авах ёстой цалин гэж үзэхгүй. Соён гэгээрүүлэх, нийгэмд үлгэрлэх, зөв зүйтэй байх ажлаа хийхгүй байгаа тамирчдын асуудлыг заавал гаргаж ирж тавих ёстой гэдэг чиглэлийг Засгийн газарт өгсөн.

Одоо ирэх Хоёрдугаар сард Засгийн газар энэ асуудлыг оруулж ирж, БСШУС-ын Байнгын хороонд танилцуулах үүрэгтэй байж байгаа.

Хоёрдугаарт, энэ урамшууллыг Олимпын спорт гэж туйлшрах хэрэггүй. Нийтийн биеийн тамир гэж нийт иргэдийг эрүүл саруул байлгах чиглэлд хандсан спортууд байна. Олон залуусыг эрүүл чийрэг байлгаж байгаа зарим салбарыг яагаад урамшуулж болохгүй байгаа юм. Бусад салбарыг ч бас төр харах ёстой гэсэн байр суурийг барьж байгаа.

Мөн гуравдугаарт, насан туршид нь мөнгөн урамшуулал олгож ид ажиллаж хөдөлмөрлөх насанд нь тэтгэвэрт гаргаж болохгүй.

Нэг хүнд дунджаар сар бүр 8 сая төгрөг олгож байгаа. Дээрээс нь энэ хүмүүсийг БТСХ-ноос соён гэгээрүүлэх, нийгмийн сайн сайхан үйл ажиллагаанд оролцуулах гэхээр ирдэггүй гэж байгаа юм. Тэгэхээр магадгүй журмыг яаж өөрчлөх ёстой вэ гэдэг асуулт гарч ирж байна. Ид залуу байгаа үед буюу нэг Олимпыг циклд олгоод, хожим тэтгэвэрт гарсан хойно нь үргэлжлүүлээд олгодог байх. Эсвэл сардаа зайлшгүй сургууль болон сайн үйлсийн аянд оролцох, залуучуудад лекц унших, үлгэрлэх, тайлан тавидаг байх ийм байдлаар зохицуулалт заавал оруулах шаардлагатай болсон байна.

Монгол улсын Ерөнхийлөгчийн гаргасан зарилгаар Засгийн газарт хэрэгжүүлэхийг үүрэг болгосон журмаар сар бүр урамшуулал олгоод байна гэдэг нь асар учир дутагдалтай байгаа юм.

Энэ асуудлыг ганц Олимпын аваргын холбогдсон хэргээр яриад байгаа юм биш. Манай тамирчидтай холбоотой их олон асуудлууд гардаг. Ний нуугүй хэлэхэд Спортын ордныг тойрсон газар, өмчтэй холбоотой маргаанууд их байдаг. Спортын салбарын томчууд нь бүгд энэ асуудалд орчихсон байдаг. Спортын салбарынхан маань өөрсдөө салбарынхаа нэр хүндийг хамгаалах тал дээр анхаарах ёстой. Ёс зүйтэй байх ёстой. Ингэж байж цалин, урамшууллын асуудал яригдах ёстой.

Монгол улс шинжлэх ухаан, соёлын салбарт насан туршид нь олгодог ийм шагнал олгохгүй байгаа. Тэгсэн мөртлөө хөгжил, дэвшил ярьдаг. Спортын салбараас бусдад олгодоггүй. Гэтэл спортын холбоод нь бүгд хоёр хуваагдсан, өмч хөрөнгө дээр нь томчууд нь оролцчихсон асуудлууд байгаа. Энэ бол зөвхөн ганц хүнтэй холбоотой асуудал биш. Би спортод хайртай. Гэхдээ энэ мэт ёс бус зүйлийг нь тэвчээд суугаад байж болохгүй” гэлээ.