Ардчилсан намаас Монгол Улсын хууль, шүүхийн шударга бус тогтолцоо, нийгэмд шударга бус давхар стандарт тогтсонтой холбоотойгоор мэдээлэл хийлээ.

Энэ үеэр НИТХ-ын Тэргүүлэгч, Нийслэлийн АН-ын дэд дарга Д.Энхтуяа Нийслэлийн АН-ын дарга Э.Бат-Үүлийн хотын дарга байхдаа хийж байсан ажлуудын талаар ярьлаа. 

Тэрээр "Өнөөдөр нийслэлийн иргэдийн 60 гаруй хувь нь гэр хороололд амьдарч байна. Э.Бат-Үүл хотын дарга байхдаа гэр хорооллын барилгажилт, гэр хороолол руу дэд бүтэц оруулах ажлыг маш эрчимтэй хийсэн.

Харамсалтай нь эрх баригчид энэ хүний эхлүүлсэн бүх ажлыг зогсоож үгүй хийсэн. Монгол төр юм хийсэн хүндээ халтай гэж ярьдаг энэ үнэхээр үнэн юм байна гэдгийг та бид бүгдээрээ харлаа.

Нийслэл хотын 60 гаруй хувь нь амьдарч байгаа гэр хорооллыг хэн ингэж зоригтой шийдэж байсан юм бэ?!

Яармагийн хурдны зам, зуслангийн зам, замын уулзваруудын өргөтгөл, гудамж төсөл зэрэг эдгээр том ажлыг зориг гарган хийж хэрэгжүүлсэн мөн бага дунд орлоготой, Төрийн албан хаагчид, залуу гэр бүлүүдэд зориулсан дахин төлөвлөлтийн дээрх ажлууд 2012-2016 онуудад үнэхээр амжилттай хэрэгжиж өнөөдөр Буянт ухаа хороолол, Хангай хотхон гээд залуу гэр бүлүүдээ дэмжсэн олон хотхонууд сүндэрлэсэн.

Бид болон Ардчилсан намын зүгээс энэ шударга бус явдалтай цаашдаа тууштай тэмцэх болно" гэлээ.