Ардчилсан намаас Монгол Улсын хууль, шүүхийн шударга бус тогтолцоо, нийгэмд шударга бус давхар стандарт тогтсонтой холбоотойгоор мэдээлэл хийлээ.

Ардчилсан намын дарга асан С.Эрдэнэ "Эрх баригчид Монголыг коммунизмын аргаар удирдаж, чиглүүлнэ гэж бодож байгаа бол эндүүрэл шүү. Монголын ард түмэн эрх чөлөөнд дуртай. Хэнд ч, хэзээ ч булаалгахгүй гэдгийг энд зориуд хэлмээр байна. Хууль шүүхийн тогтолцоо иргэдэд тэгш бус үйлчилж байна. Анхааруулмаар байна. Коммунизмын дарлалаас салаад дөнгөж 30 жил болж байхад ковидизмын дарангуйллаар онц нөхцөл байдлыг далимдуулж, олон их наядаар идэж ууж, иргэдийн эрхийг зөрчиж эхэллээ. Цар тахлаар далимдуулан иргэдийг хааж боосоор байна" гэлээ.

Мөн тэрээр "Нөгөө алдарт ЖДҮ-чид хаана байна. Хэн хариуцлага хүлээсэн бэ? Төрөөс хэдэн тэрбум, их наядаар идсэн хулгайчид хаана байна. Ардчилсан нам одоо хатуу тэмцэнэ. Шинжээчдийн баг гарч ажилласан ч хохирол тогтоогдоогүй байхад Хотын дарга асан Э.Бат-Үүлд яллах дүгнэлт үйлдсэн байна. Улс төрийн зорилгоор хуулийн дүгнэлт үйлдсэн гэж харагдаж байна. Түүнийг хэлмэгдүүлсэн гэж хардаж байгаа учир АН-аас стратегийн өмгөөлөл хийж ажиллана. Ерөнхийлөгч асан Х.Баттулгын томилсон шүүгчид эзнийхээ даалгаврыг биелүүлж байхыг үгүйсгэхгүй. Бид улс төрийн бүх хэлбэрээр шударга үнэний төлөө тэмцэнэ" хэмээлээ.