Ардчилсан Хувьсгалын 31 жилийн ой, Ардчилсан намын 21 жилийн ой, Ардчиллын төлөөх намууд нэгдсэн өдрийг /арванхоёрдугаар сарын 16/ тохиолдуулан, хүний эрхийг үзэл баримтлалынхаа төвөө болгон сахин хамгаалдаг Ардчилсан нам XXI зуунд, улс нийгмийнхээ байдал, өөрчлөлт, хувьсал, хөгжил, хэтийн төлөвийн чиг хандлагын талаарх эрдэмтэн судлаачдын судалгаа, шинжилгээ, дэвшүүлж буй үзэл санааг хэлэлцүүлэх, гишүүд дэмжигчиддээ таниулан сурталчилах зорилгоор "ИРГЭНИЙ АРДЧИЛАЛ XXI ЗУУН" эрдэм шинжилгээний бага хурлыг зохион байгуулж байна.
Эдийн засагч М.Чимэддорж ''Иргэнгүй эдийн засаг'' сэдвийн хүрээнд илтгэлээ тавив.
Тэрээр "Өнөөдөр бид Ардчиллын 30 жилийн түүхийг ярьж байна. Бид өнөөдөр иргэнээсээ холдож байгаа төрийн гэрч болон амьдарч байна.
2010 онд байсан 100 төгрөг өнөөдөр 232 төгрөгтэй тэнцэж байна. 1990 оноос хойш МУ-д зах зээлийн эдийн засгийн систем бий болсноор өмчийн олон систем бий болсон. Гэвч өнгөрсөн хугацаанд Төр бизнесийн салбартай хутгалдсаар хувийн эдийн засгийн хэвшлийг улам бүр шахсаар байна. Цаашдаа энэ эрчээрээ байвал Монголд зах зээлийн эдийн засаг, хувийн хэвшил хумигдах аюул нүүрлэж байна.
Төр улам бүр данхайсаар байна. Төрийн бүтэц улам бүр өсөн нэмэгдсээр 9 даргын ажлыг 10 дарга хийдэг болж. Энэ олон дарга нарыг дагаад тэдний хангамж өсөж, улсын эдийн засгаас гарч буй төсөв нэмэгдсээр байна. 10 жилийн хугацаанд МУ-ын улсын төсөв 6 дахин өссөн байна. МУ-ын эдийн засаг төрд суурилсан эдийн засаг руу явсаар дарга нарын зарцуулж буй мөнгө 6 дахин өссөн байна. МУ-ын ЗГ-ын өр сүүлийн 5 жилийн хугацаанд 2 дахин нэмэгдсэн байна. Энэ бол Ардчилалд тулгамдаж буй хамгийн том гажуудал юм" гэлээ.
