Ардчилсан Хувьсгалын 31 жилийн ой, Ардчилсан намын 21 жилийн ой, Ардчиллын төлөөх намууд нэгдсэн өдрийг /арванхоёрдугаар сарын 16/ тохиолдуулан, хүний эрхийг үзэл баримтлалынхаа төвөө болгон сахин хамгаалдаг Ардчилсан нам XXI зуунд, улс нийгмийнхээ байдал, өөрчлөлт, хувьсал, хөгжил, хэтийн төлөвийн чиг хандлагын талаарх эрдэмтэн судлаачдын судалгаа, шинжилгээ, дэвшүүлж буй үзэл санааг хэлэлцүүлэх, гишүүд дэмжигчиддээ таниулан сурталчилах зорилгоор "ИРГЭНИЙ АРДЧИЛАЛ XXI ЗУУН" эрдэм шинжилгээний бага хурлыг зохион байгуулж байна.

Хууль зүйн сайд асан Х.Тэмүүжин ''Иргэнгүй Төр'' сэдвийн хүрээнд илтгэлээ хэлэлцүүллээ.

• Бид хүний эрхийг хамгаалдаг, Ардчиллын дуу хоолой болдог ардчилсан институцыг бий болгож чадсан уу?
• Энэ институцууд ардчилсан соёлыг бий болгож чадсан уу?
• Шүүх шударга ёсыг бэхжүүлж чадаж байгаа юу?
• Засгийн газар нь Монгол улсын нутаг дэвсгэр дээр хуулийн биелэлтийг бүрэн хангаж чадаж байгаа юу?
• Ардчилсан соёл буруу үйлдвэрлэгдэж байгаа бол энэ юу болж хувирах вэ?

Тэрээр "Өнөөдрийн Монголын ардчилал хэн нэгнийхээ дээр гарч чадаж байвал бие биерүүгээ нулимдаг гажуудсан Ардчилал болжээ.

Иргэнгүй эдийн засаг, Иргэнгүй хууль, Иргэнгүй улс төр бий болж байна. Иргэний эдийн засаг зогсож байхад дарга нарын эдийн засаг хэзээ ч зогсдоггүй. Тэдний зардаг мөнгө үргэлж нэмэгдэж байхад, иргэдийн халаасанд орж байгаа мөнгө үргэлж танагдаж байна.

Намууд ил цагаан мөнгөтэй хүмүүсийн бөөгнөрөл болсон байна. Бид анх Аад түмэн нь төрөө байгуулдаг төрийн тухай ярьсан бол 30 жилийн дараа байдал эсэргээрээ байна.

Улс төр, Эдийн засаг, Хууль шүүхийн тогтолцоо зөвхөн эрх мэдэлтний аясаар хөдөлж тэдний төлөө бүх хүчээ зарж байна.

Тийм учраас Ардчилсан нам иргэнрүүгээ чиглэсэн, иргэнээ мартаагүй ардчиллыг хэрхэн бий болгох вэ? гэдэг консепцийг баримтлах ёстой. Үүнийг Ардчилсан нам л хийж чадна. Үүнийг хийхийн тулд бид ухаалаг байх ёстой" гэлээ.