"Бодь мөрийн зэрэг", "Тарнийн мөрийн зэрэг" судрыг айлдсан Богд Зонховын хөшөөг 32 тэрбум төгрөгөөр барихаар УИХ-аар батлуулсан. Тасганы овоонд хэзээний эхэлсэн энэ бүтээн байгуулалтын ажил асуудал, шүүмжлэл дагуулсаар байна.
Сангийн сайд асан Ч.Хүрэлбаатар “У.Хүрэлсүхийн Засгийн газар төсөв өргөн барихад энэ төсөл байгаагүй. Гурван гишүүний саналаар нэмэгдсэн” гэсэн бол Соёлын сайд Ч.Номин "Цаг үеэ олоогүй гэж үзэж байгаа учраас Соёлын сайдын хувьд “Богд зонхова” цогцолборын төсөлд хөрөнгө зарцуулахгүй болохоо үүгээр мэдэгдэж байна" гэсэн юм.
Ийнхүү төсөв батласан УИХ-ын гишүүд маань энэ талаар “огт мэдээгүй” гэж мэлзээд зогсохгүй хэргийн эзнийг хайж эхэлжээ.
Тэгээд нэр бүхий гурван гишүүд буюу Ц.Цэрэнпунцаг, Ц.Анандбазар, Г.Занданшатар нар энэхүү хөшөөг барих ажлыг санаачилжээ.
Тэгвэл өнөөдөр энэ асуудлаар УИХ-ын гишүүн Ц.Цэрэнпунцаг байр сууриа илэрхийллээ.
Тэрээр "Улсын 2022 оны төсөвт боловсрол, эрүүл мэндийн салбарт их наядаар нь мөнгө суулгасан байна. Энэ мөнгө хүрэх ёстой хүмүүстээ хүрч байна уу гэдгийг анхаарах хэрэгтэй. Бүхнийг фронтын төлөө гэдэг шиг л хоёр жил явлаа шүү дээ.
Бидний амьдрал үргэлжилж байна. Улс, орнууд хилээ нээгээд эхэллээ.
Тасганы овоо түүхийн хувьд чухал дурсгалтай газар. Энийг хамгаалж тохижуулалт хийх ёстой. Монголд жуулчид ирээд юуг үзэж харах вэ. Би энэ төсөл үргэлжлэх ёстой гэж бодож байна. Гэхдээ одоогоор төсвөөс нэг ч төгрөг гараагүй. "Богд Зонхова" гэдэг ТББ зураг төсөл зэрэг ажлыг хариуцаж явдаг юм билээ" гэв.
