"Бодь мөрийн зэрэг", “Тарнийн мөрийн зэрэг” судрыг айлдсан Богд Зонховын хөшөөг 32 тэрбум төгрөгөөр барихаар УИХ-аар батлуулсан. Энэ асуудал сүүлийн гурван өдөр шүүмжлэл дагуулсаар байна.
Соёлын сайд Ч.Номин ямартай ч өнөөдөр өөрийн цахим хуудаснаа мэдэгдэл хийж, "Цаг үеэ олоогүй гэж үзэж байгаа учраас Соёлын сайдын хувьд “Богд зонхова” цогцолборын төсөлд хөрөнгө зарцуулахгүй болохоо үүгээр мэдэгдэж байна" гэсэн юм.
Гэтэл дахин нэг сенсаац цахим хуудаснаа нэмэгдэв. УИХ-ын гишүүн М.Оюунчимэг өөрийн сонгогдсон дүүрэгтээ 32 тэрбум төгрөгийн бүтээн байгуулалтын ажил, хөрөнгө оруулалт тусгагдаад байхад нь мэдээгүй гэж мэлзэв.
Тэрээр "Чингэлтэй дүүргээс сонгогдсон гишүүдийн хувьд зургаадугаар сард Сангийн сайдын өгсөн зөвлөмжийн дагуу дүүргийн Засаг даргын зүгээс, дүүргийн иргэдээс саналыг нь аваад хариу саналаа өгөхөд ийм зүйл огт байгаагүй. Боловсрол соёл шинжлэх ухааны байнгын хороон дээр уулыг яагаад нүхлээд байгаа вэ гэж дуугарч л байсан. Нэг хэсэг зогссон байсан. Тэнд бурханы хөшөө барьж байгаа гэсэн мэдээлэл аваагүй. Соёлын сайд хөшөөний төсвийг мэдэхгүй байна гэж байхгүй. Би бол мэдээгүй" гэж жиргэв.
Мөн түүнчлэн "Цар тахлын хүнд хэцүү үед хөшөө барих цаг биш. Хүүхдийн эмнэлэг, Түлэнхийн төв, ХӨСҮТ гээд зайлшгүй хөрөнгө оруулалт, санхүүжилт шаардлагатай газарт бас эмч эмнэлгийн ажилтнуудын цалин хөлс нэмэх тал дээр Нийгмийн бодлогын байнгын хороо тултал зүтгэсэн" гэжээ.
