"Бодь мөрийн зэрэг", “Тарнийн мөрийн зэрэг” судрыг айлдсан Богд Зонховын хөшөөг 32 тэрбум төгрөгөөр барихаар 2022 оны улсын төсөвт тусгаж, УИХ-аар батлуулсан. Энэ асуудал сүүлийн гурван өдөр маргаан дагуулсаар байна.
Хэдийгээр Соёлын сайд Ч.Номин энэ асуудлаар цахим хуудаснаа тайлбар хийсэн ч асуудал намжихгүй л байна.
Түүний мэдэгдлээс улбаалж Ч.Номин сайд дангаараа төсөвт өөрчлөлт оруулах санал гаргах эрхтэй эсэх асуудал хөндөгдлөө.
Энэ талаар Сангийн сайд Б.Жавхлан "Төсвийн ерөнхийлөн захирагч буюу Соёлын сайд Ч.Номин "Богд Зонхова" цогцолборын төслийг санхүүжүүлэхгүй гэдэг саналаа Засгийн газарт оруулах эрхтэй" гэсэн тайлбарыг өглөө.
Дашрамд, төсвийн тогтвортой байдлын тухай хуулийн 10.1.3-т "Төсвийн төсөл болон батлагдсан төсөвт нэмэлт, өөрчлөлт оруулах санал боловсруулахдаа дунд хугацааны төсвийн хүрээний мэдэгдэлд нийцүүлэх" гэж заасан байдаг.
Өөрөөр хэлбэл, Ерөнхийлөгч хориг тавих эсвэл батлагдсан төсвийг эгүүлэн татахгүйгээр төсвийн ерөнхийлөн захирагч нь өөрөө төсөвт тусгасан тухайн төслийг санхүүжүүлэхгүй гэдэг асуудлаа Засгийн газарт оруулж, хэлэлцүүлэх эрхтэй юм байна.
