Ерөнхий сайд Л.Оюун-Эрдэнэ 2022 оны төсвийн онцлох зарцуулалтын талаар мэдээлэл өглөө.

Тэрээр "Ерөнхий сайдын анхныхаа төсвийг батлууллаа. УИХ-д талархал илэрхийлье. Төсвийн онцлох зүйл бол хөгжлийг хязгаарлах хүчин зүйлүүдийг арилгахын төлөө хичээсэн. Монголын улсын хөгжлийг сааруулагч эхний хүчин зүйл бол эрчим хүч, боомтууд бас хотын түгжрэл. Энэ гурван асуудалд төсөв төвлөрсөн байгаа.

Эрчим хүчний салбар хүнд байдалд орсон. Үнийг нь бид чөлөөлж чаддаггүй, зээл авах тусам ашиггүй. Улаанбаатар хот өдрөөс өдөрт өргөжин тэлж, эрчим хүчний хэрэглээ өсөн нэмэгдэж байгаа. Бодит байдал дээр өнөөдөр цаг агаар харьцангуй дулаан байгаа ч хасах 34-35 хэм хүйтэрвэл Улаанбаатар хот "хөлдөх" эрстэлтэй. Энэ бол өнгөрсөн 30 жилийн л асуудал.

Хоёрудгаарт, боомтоо өргөтгөхгүй бол хүнс зөвхөн Замын-Үүд, нүүрс зөвхөн Гашуунсухайт боомтоос хамааралтай. Гэтэл Монгол Улс 26-27 боомттой. Харамсалтай нь бид авто зам, төмөр замаа ч холбож чадаагүй. Тийм учраас ирэх жил Ханги-Мандал боомтыг холбох, Хөөт Бичигтийн төмөр замаа бэхлэх болон боомтуудыг авто замаар холбох төсөв тавигдсан.

Гуравдугаарт, Улаанбаатар хотын хувьд анх удаа 420 орчим тэрбум төгрөгийн хөрөнгө оруулалт тавигдсан" гэлээ. 

Мөн тэрээр Замын-Үүд, Эрээний боомтын асуудлаар "Цар тахлын амаргүй үед зөвхөн Монгол улсад биш дэлхий дахинд хүнд байна. Энэ нь тээвэр, ложистикийг удаашруулж байгаа учраас хомсдол үүсч байгаа юм. Энэ асуудал 1-2 жил үргэлжлэх магадлалтай. Үүнд бид нар сэтгэл зүйн бэлтгэлтэй байх хэрэгтэй байна. Яагаад гэхлээр биднээс хамаарч байгаа асуудал биш. 

Бид өглөө бүр Эрээнээс мэдээ авч байгаа. Нэмэлт тохиолдол илрэхгүй бол 21 хоногийн дараа хэвийн горимд шилжих журамтай юм билээ. Дахиж халдварын тохиолдол шинээр нэмэгдэхгүй бол 10-12 хоногийн дараа хэвийн байдалд шилжинэ гэсэн урьдчилсан мэдээлэл аваад байна" гэсэн юм.