Хууль зүйн сайд асан, хуульч Х.Тэмүүжингээс хоёр жил хүрэхгүй үндсэн хуульд нэмэлт өөрчлөлт оруулах гэж байгаа асуудалд ямар байр суурьтай байгааг тодрууллаа. 

Тэрээр "2019 оны үндсэн хуулийн нэмэлт өөрчлөлтөд Ардчилсан нам байр сууриа илэрхийлж байсан. Үндсэн хуульд нэмэлт өөрчлөлт оруулах журмын тухай хуулийн найман жил гэдэг асуудал байгаа. Тухайн зүйл заалтад өөрчлөлт орсон бол, найман жил гар хөдлөхгүй гэсэн зарчим. Харин үндсэн хуулийг өөрчлөхгүй гэсэн зарчим ерөөсөө байхгүй. 

Үндсэн хуульд эрх баригчид нэмэлт өөрчлөлт оруулах бол, дөрвөн зүйлд эсрэг байр суурьтай зогсоно. Нэгдүгээрт, хүний эрхийг дордуулсан зүйл заалт оруулахыг хатуу эсэргүүцнэ. Хоёрдугаарт, эрх мэдлийн хуваарилалтыг алдагдуулсан зүйл заалт оруулбал эсэргүүцнэ. 

Яагаад гэвэл хүний эрхийн баталгаа өөрөө эрх мэдэл, хуваарилалт байдаг учраас нэг дэх зарчим дээр хатуу зогсож байгаа бол хоёр дахь зарчим дээр хатуу зогсохоос өөр аргагүй. 

Гуравтдугаарт, үндэсний тусгаар тогтнол, монгол улсын суурь эрх ашигтай холбоотой асуудлууд дээр таагүй үр дагавартай бол эсрэг байр суурьтай зогсоно. Дөрөвдүгээрт, үндсэн хуулийн хүч чадлыг өөрийг нь сулруулах зорилготой ямар нэгэн өөрчлөлтийн эсрэг бид хатуу зогсоно.

Харин дэмжих хэд хэдэн зүйл бий. Тухайлбал, сонгуулийн холимог тогтолцоо. Иргэд дуу хоолойгоо жигд төлөөллийн байгууллагадаа хүргэж байхын тулд холимог тогтолцоо зайлшгүй байх ёстой. Энэ зарчмыг үндсэн хуулийн нэмэлт өөрчлөлтйин түвшинд шийднэ гэж байвал АН дэмжинэ. Мөн 2019 оны нэмэлт өөрчлөлтөөр зөвшилцөл нэрийн дор алга болсон шударга шүүхийг бэхжүүлэх болон үндсэн хуулийн цэцийг хариуцлагажуулах чиглэлийн нэмэлт өөрчлөлтүүд тэр үед хамгийн түрүүнд хасагдаж байсан. Тэгэхээр энэ удаагийн нэмэлт өөрчлөлт хэрвээ явагдах бол иргэний үндсэн эрхийг хамгаалах зорилготой үндсэн хуулийн шүүхийн системийг бий болгох алхмыг зайлшгүй хийх ёстой" гэв.