Засгийн газар, Ерөнхий сайд Л.Оюун-Эрдэнэ нар коронавирусын халдварын улмаас УОК-оос тогтоосон хорио цээрийн дэглэмийг зөрчин "Цахим үндэстэн" шоуг Үндэсний цэцэрлэгт хүрээлэнд зохион байгуулсны дараа цагдаагийн байгууллагаас нийслэлийн төв талбайд үг хэлэх эрх чөлөөгөө эдлэн эсэрүүцлийн суулт зохион байгуулсан залуучуудыг "хорио цээрийн дэглэм зөрчсөн" хэмээн удаа дараа баривчлан саатуулсан явдал зун намрын турш үргэлжилсэн билээ.
Эрх баригчдын энэ ялгаварлалыг эсэргүүцсэн "Nodoublestandart" хөдөлгөөний зохицуулагч Э.Одбаярыг энэ сарын 6-ны өдөр хойшлуулшгүй үндэслэлээр баривчлан 461 дүгээр ангид саатуулсан. Нийслэлийн прокурорын газраас Э.Одбаярт эрүүгийн хэрэг үүсгэж яллагдагчаар татан, хорих хүсэлтийг шүүх хүлээн авч "Батлан даалтанд байх хугацаандаа дахин хэрэгт холбогдсон" гэх үндэслэлээр нэг сар цагдан хорихоор шийдвэрлэсэн байдаг.
Гэвч Э.Одбаяр нь саатуулагдсан өдрөөсөө эхлэн эхлэн өөрийгөө "хууль бусаар баривчлагдсан" хэмээн заргалдаж, шүүхийн шийдвэрийг эсэргүүцэж хорин 461-р ангид 23 хоногийн турш өлсгөлөн зарлаад байгаа. Гэвч сүүлийн өдрүүдэд түүний биеийн байдал муудаж, уургийн дутагдалд орсон нь амь насанд нь эрсдэлтэй гэдгийг өмгөөлөгч нь мэдэгдсэнээс хойш хоёр хоногийн дараа шүүгчийн шийдвэрээр Э.Одбаярыг суллахаар болжээ. Түүнийг суллах тухай шүүгчийн захирамж дөнгөж сая гарч, Э.Одбаярт хилийн хориг тавьжээ.
