"Хувь хүний мэдээллийг хамгаалах тухай хуулийн төсөл"-ийг өнөөдөр хэлэлцүүллээ. Улмаар тус хуульд хэд хэдэн халгаатай зүйл заалт байгаа юм. Энэ асуудлаар Б.Пүрэвдоржоос тодрууллаа.

УИХ-ын гишүүн Д.Пүрэвдорж "Энэ хуульд хүний эрх болон бизнесийн эрхийг зөрчсөн асуудал байна. Тухайн хүний хувийн мэдээлэлтэй холбоотой асуудлыг төрийн байгууллагууд хэр хэмжээнд авах, үүнийгээ яаж ашиглах юм, хувь хүн өөрөө мэдээллээ олж авах эрхтэй, түүнийгээ ямар хэмжээнд олон нийтэд зарлаж болох юм гэдэг зааг ялгаа тодорхой биш байна.

Тийм учраас хүний эрхтэй холбоотой нэлээдгүй олон асуудлуудыг хөндөж байгаа учир АН анхнаасаа хүний эрхийн төлөө ажилладаг. Гэтэл манай бүлгээс нэг ч гишүүн оруулахгүйгээр энэ хуулийн төслийн ажлын хэсгийг хуралдуулаад явсан байна. Тийм учраас ажлын хэсэгтэй уулзаж ярилцаж, мэдээллүүдийг авах асуудал дээр хүний эрхийг хангах ямар дэвшил гарах юм гэдгийг ярьж байж хуулиа хэлэлцэе гээд завсарлага авсан байна.

-Тухайлбал хуулийн 29,2 гэсэн заалтад иргэн аливаа нэгэн албан тушаалтны талаар бичихдээ тухайн эзнээс нь зөвшөөрөл авалгүйгээр хэвлэн нийтлэхийг хориглоно гэсэн заалт байгаа. Энэ зүйл заалтын тал дээр ямар байр суурьтай байгаа вэ? 

-Бидний хамгийн том эрх бол мэдэх эрх. Энэ хүрээнд төрийн өндөр албан тушаалтнуудын талаар иргэдийн мэдэх эрхийн хүрээнд хэвлэн нийтэлж мэдээлэл өгөх ёстой.

Гэтэл энэ хэвлэн нийтлэх, ард түмэнд мэдээлэл өгөх эрхийг бүрэн хаасан ийм л заалт болчихоод байна. Тэгэхээр энэ заалт цаашаа дэлгэрээд явах юм бол хэн нэгэн хүнийг өөрийн чинь талаар мэдээлэл гаргах гээд байна та зөвшөөрөл өгөөч гэх юм бол авлига хээл хахууль хүнд суртал ерөөсөө илрэхгүй нуугдмал байн нөхцөл бүрдэнэ. Тэгэхээр бид аль болох нээлттэй байх, ялангуяа хэвлэл мэдээллийн байгууллагынханд мэдээлэл хийх эрх чөлөөг нь олгож өгөх тал дээр анхаарч бүлэг дээрээ ярилцана.