УИХ-ын 18, 28 дугаар тойргийн нөхөн сонгуулийн дүн албан ёсоор гарч, Ц.Идэрбат, Э.Батшугар нарыг парламентын гишүүнээр сонгогдсоныг Сонгуулийн ерөнхий хорооноос мэдэгдлээ.
Ийнхүү УИХ 76 гишүүнтэй болж бүрэн бүрэлдэхүүнээрээ хуралдах боломжтой болов.
Хэнтий аймгийн Засаг даргын албан тушаалаас Их хурлын гишүүнээр сонгогдсон Ц.Идэрбат ажлын гараагаа МАН-ын хорооны улс төрийн ажилтанаар эхлүүлж байжээ. Харин аавынхаа нэрээр олонд танигдсан Э.Батшугар энэ удаагийн парламентын хамгийн залуу гишүүнээр тодорч байна. Тэрбээр 1987 онд төрсөн аж.
Хуулийн дагуу Сонгуулийн ерөнхий хорооноос нөхөн сонгуулийн дүнг өнөөдөр УИХ болон Ерөнхийлөгчид хүргүүлж буй. Улмаар энэ долоо хоногт УИХ-ын чуулганаар шинэ гишүүдийг тангарах өргүүлэх ажээ.
Шинээр парламентад сонгогдсон гишүүдийн намтар болон хөрөнгө орлогын мэдүүлгийн танилцуулж байна.
ЭНХБАЯРЫН БАТШУГАР
1987 Улаанбаатар хотод төрсөн
Төгссөн сургууль, мэргэжил:
- 1994 онд орос 14-р сургуульд элсэн орсон,
- 2000 онд АНУ-ын Калифорниа мужийн ахлах сургуульд шилжин суралцсан,
- 2004-2008 онд АНУ-ын Бэнтлигийн их сургуулийг санхүү, эдийн засагч мэргэжлээр суралцаж төгссөн
Ажилласан байдал:
- 2008 онд Америкийн “Жи Пи Морган” /JP Morgan/ хөрөнгө оруулалтын банкинд банкир,
- 2012-2016 онд Монголбанкны дэд ерөнхийлөгч,
- 2016-2021 онд хувийн бизнес
Сонгуульт ажил:
- Монгол Ардын Намын бага хурлын гишүүн болон Монгол Ардын Намын удирдах зөвлөлийн гишүүн
ЦАГААНХҮҮГИЙН ИДЭРБАТ
1981 онд Хэнтий аймагт төрсөн
Төгссөн сургууль, мэргэжил:
- 1989–1998 онд Хэнтий аймгийн ерөнхий боловсролын нэгдүгээр сургуулийг төгсөж бүрэн дунд боловсрол,
- 1999-2003 онд Гадаад хэлний дээд сургуулийг Англи хэлний багш мэргэжлээр төгсөж, дээд боловсрол, бакалаврын зэрэг,
- 2006-2007 онд Засгийн газрын хэрэгжүүлэгч агентлаг Удирдлагын академид суралцаж, төрийн удирдлагын менежерээр тус тус төгссөн.
Ажилласан байдал:
- 2003–2008 онд аймгийн МАН-ын хорооны улс төрийн ажилтан,
- 2008–2012 онд Хэрлэн сумын Засаг даргын орлогч,
- 2012-2016 онд аймгийн МАН-ын хорооны дэд дарга,
- 2016-2020 Хэрлэн сумын Засаг дарга бөгөөд Чингис хотын захирагч,
- 2008 оноос хойш Хэнтий аймгийн Иргэдийн Төлөөлөгчдийн Хуралд төлөөлөгч, тэргүүлэгч
- 2020 Хэнтий аймгийн Засаг дарга
Сонгуульт ажил:
- МАН-ын бага хурлын гишүүн,
- Аймгийн МАН-ын хорооны тэргүүлэгч,
- Хэрлэн сумын МАН-ын хорооны даргын сонгуульт ажилтай.
