Удахгүй АН-ын их хурлыг хуралдуулж, нам дотор үүсээд байгаа талцал хуваагдлыг нэг мөр дуусгахаар амласан намын удирдлагууд бэлтгэл ажилдаа оров бололтой. Бэлтгэл ажлын нэг хэсэг нь өчигдөр УИХ-ын гишүүн Ц.Тувааныг АН-ын гишүүнээс таван жилийн хугацаагаар хасах сахилгын шийтгэл оногдуулж, гишүүн Н.Алтанхуяг, С.Ганбаатар нарын АН-ын бүлгээс хөөсөн явдал байлаа. Хөөх ч гэж дээ, угаасаа хуулийн хувьд боломжгүй шийдвэр гаргаж, Н.Алтанхуяг, С.Ганбаатар нарыг бүлэгт авснаа залруулсан хэрэг. Н.Алтанхуяг, С.Ганбаатар нар АН-ын бүлэгт яг таван сар болоод гарч байгаа юм байна. Одоо УИХ дахь АН-ын бүлэг 10 гишүүнтэй үлдлээ.

Өмнөх УИХ-уудын үед АН, МАН-ын бүлэг нийлээд "62 бүдүүн бүлэг" гэх мэтийг байгуулж болдог байсан ч УИХ-ын тухай хуульд "УИХ дахь намын бүлгүүдийг зөвхөн сонгуулийн үр дүнгээр байгуулах" тухай өөрчлөлт оруулснаар нэг намын бүлгээс гарч нөгөө намын бүлэгт ордог барьдаг явдал үгүй болсон билээ. Тэгсэн хэрнээ тухайн намаас сонгогдсон гишүүн намаасаа гараад шинэ нам байгуулчихвал намын бүлгээс нь хасчихдаг. Өмнөх УИХын үед Ж.Батзандан, Л.Болд нар АН-аас гарч ШИНЭ /Шударга иргэдийн нэгдсэн эвсэл/ намыг байгуулснаар АН УИХ-д бүлэггүй болж байлаа.

Тиймээс хуулийн хувьд бол угаасаа МАХН-аас нэр дэвшиж сонгогдсон С.Ганбаатар, бие дааж сонгогдсон Н.Алтанхуяг нарыг АН-ын бүлэгт байх, АН-ын бүлгийн шийдвэрт оролцох эрхгүй гэж шийдсэнд гайхах зүйл байхгүй. Хоёрдугаарт сүүлд болсон үйл явдлын дараа (Д.Ганбат, С.Одонтуяа нарыг бүлгийн даргаас огцруулах гэсэн) Н.Алтанхуяг, С.Ганбаатар нарыг АН-ын бүлгийн шийдвэрт оролцох эрхгүй гэсэнд ч эмзэглээд байх шалтгаан байхгүй. Тэдний төлөвлөснөөр Ц.Туваан УИХ дахь намын бүлгийн дарга болсон бол АН УИХ дахь сөрөг хүчний байр сууриа алдаж, МАН-ын дарга Л.Оюун-Эрдэнийн зөвлөх, Ерөнхийлөгч асан Х.Баттулгын "алчуур" болоод МАН-д очих байлаа.  

Тиймээс ямар ч байсан намын их хурал болохоос өмнө амжиж, хуулийн хувьд ядахдаа "Женко"-гоосоо тусгаарлах гэсэнд гайхаад байх зүйл алга. Ямарч байсан парламент дахь намын бүлгийн хувьд "Женко" Х.Баттулгын эрхшээлээс гарч чадлаа гэсэн үг. Өмнө нь УИХ дахь АН-ын бүлгийн 11 гишүүний гурваас бусад /Б.Пүрэвдорж, С.Эрдэнэ, С.Одонтуяа/ нь "Женко"-гийн хүн гэж харагддаг байсан бол өнөөдөр тооны харьцаа нөгөө талд гарсан бололтой. Ерөнхийлөгч асан өөрөө МАН-ын даргын зөвлөхийн албан тушаалыг шохоорхоогүй бол ийм зүйл болохгүй ч байсан байж мэднэ. АН ядарлаа ядарлаа гээд МАН-ын даргын зөвлөхийн халаасны нам болж болохгүй биз дээ. Х.Баттулгын халаасанд байх, Л.Оюун-Эрдэнийн зөвлөхийн халаасанд байх хоёрт ихээ том ялгаа бий.

Харин Ц.Тувааны хувьд ХАА-н дэд сайд байхаасаа л Х.Баттулгын ивээл дор малын вакцинаар баяжсан болохоор холдъё гэхнээ холдох газаргүй байгаа биз. Жаахан сарвалзах гэвэл нөгөөх нь хүзүүн дэх олсноос нь нэг дугтарчихад номхроод ирнэ.

Харин Н.Алтанхуягийн хувьд "Х.Баттулга л гэсэн үг" гэж хэлэгдэж байгаа ч албан ёсоор АН-ын гишүүн бус учраас /УИХ-ын 2020 оны сонгуульд бие дааж нэр дэвшсэнийх нь дараа С.Эрдэнэ намын гишүүнээс хассан/ тоглоомонд шууд оролцох боломжгүй гэсэн үг. Нэг иймэрхүү нөхцөл байдал дунд АН-ын Их хурал хуралдаж, даргынхаа асуудлыг шийдэхээр болоод байна. Хамгийн гол нь намын тамга С.Эрдэнийн нэр дээр байгаа. Энэ тамгыг хэнд шилжүүлэхийг АН биш, МАН өөрийн шүүхээр шийдэх болчихоод байгаа нь л эмзэглэл төрүүлж байна даа.