УИХ-ын гишүүн Б.Энхбаяр ЗГХЭГ-ын дарга Ц.Нямдоржийг Цэцэд өгөхөө мэдэгджээ. Түүний хэлснээр Ц.Нямдорж нь төрийн болон орон нутгийн өмчит хуулийн этгээдийн талаарх эрх зүйн орчныг шинэчлэх хууль тогтоомжийн төслийг дөрвөн сар хав дарсан байна.

Б.Энхбаяр гишүүн энэ тухай "Монгол Улсын Ерөнхий сайдаас эхлээд МАН-ын дарга,  лидерүүд Төрийн өмчит компанийн засаглалыг сайжруулах реформ хийнэ, үйл ажиллагааг нь ил тод болгоно, авлигыг бууруулна гэдэг асуудлыг долдугаар сараас эхэлж ярьсан. Хууль тогтоомжийг боловсронгуй болгох үндсэн чиглэлд зааснаар 2021 оны эхэнд хуулийн төслүүд өргөн баригдах ёстой байсан, энэ хэрэгжээгүй. 2021 оны долдугаар сарын 8-нд УИХ-ын 74-р тогтоол гаргасан. Тогтоолын дагуу хууль тогтоомжийн төслийг намрын ээлжит чуулганаас өмнө өргөн мэдүүлэхийг Засгийн газарт даалгасан.  Гэтэл одоо болтол өргөн баригдаагүй, хугацаа хэтрээд долоо хонож байна. УИХ-ын шийдвэрийг биелүүлж чадахгүй бол тэр хүн ажлаа өгөх ёстой. Үүний төлөө би иргэнийхээ хувиар ҮХЦ-д хандана" гэв.