НҮБ-ын Ерөнхий Ассамблейн 76 дугаар чуулганд оролцож буй Монгол Улсын Ерөнхийлөгч У.Хүрэлсүх АНУ-ын эдийн засагч, Колумбийн их сургуулийн тогтвортой хөгжлийн төвийн захирал Жеффри Сакстай хийх уулзлаа.

Уулзалтын үеэр тогтвортой хөгжлийн зорилтууд, хамтарч ажиллах талаар санал солилцсон байна.

Түүний санаачилсан "Тогтвортой хөгжлийн төлөөх санаачилга хөдөлгөөн"-д МУИС болон зарим их, дээд сургууль элссэн байдаг.

Энэ хөдөлгөөний хүрээнд Жеффри Саксыг Монгол Улсад урьж, тогтвортой хөгжлийн бодлого болон хэрэгжилтийн талаар, ялангуяа цар тахлын дараах эдийн засгийн нөхцөл байдал, улс орнууд яаж хөгжих ёстой, хэрхэн хамтарч ажиллах талаар болон Тогтвортой хөгжлийн талаарх бүс нутгийн форумыг Монгол Улсад зохион байгуулах санал дэвшүүлж, их, дээд сургуулиудад лекц унших боломжийн талаар ярилцжээ.

Дэлхийн шилдэг гурван эдийн засагчдийн нэгд тооцогддог Жеффри Сакс "Монгол Улсад буй чадавхыг ашиглан тогтвортой хөгжлийн бодлогыг чиглүүлэхэд туслахад бэлэн. Та бүхний ажлыг дэмжинэ" гэдгээ илэрхийлжээ.

АНУ-ын эдийн засагч, Колумбийн их сургуулийн тогтвортой хөгжлийн төвийн захирал Жеффри Сакс Монгол Улсад очих хүсэлтэй ч боломж гараагүй гэдгээ мөн хэлсэн байна.