Цахим орчинд химийн бодисонд дэвтээж, үсийг нь зумлаж, хуйхалсан хонины сүүлтэй холбоотой мэдээлэл иргэдийн бухимдлыг төрүүлээд байна.
Тодруулбал, хуйхалсан хонины сүүл худалдаална хэмээн зарлал түгээсэн иргэн бээлий өмсөн химийн бодистой усанд хийсэн сүүлний үсийг зумалсан тухайгаа бичсэн байсан билээ.
Энэ нь тухайн иргэн химийн бодисод хордохоос сэргийлж бээлий өмссөн мөртлөө химийн бодисоор хордуулсан сүүл бусдад худалдаалдаг гэх хардлага төрүүлж байгаа юм.
Одоогийн байдлаар Мэргэжлийн хяналтын байгууллагад албан ёсоор гомдол мэдээлэл очоогүй тул шалгаж эхлээгүй байгаа аж.
Энэ талаар МХЕГ-аас тодруулахад “Энэ асуудал нь Мэргэжлийн хяналтын байгууллагад албан ёсоор гомдол мэдээлэл ирээгүй гээд шалгахгүй өнгөрөх зүйл биш. Юун түрүүнд, тухайн мэдээлэл хуурамч аккаунтаас түгээгдсэн худал мэдээлэл үү эсвэл үнэхээр бодитой юу гэдгийг тодорхойлох ёстой. Өөрөөр хэлбэл, цахим орчинд тархсан уг мэдээлэл үнэхээр бодит эсэхийг нягталсны үндсэн дээр шалгалтын ажиллагааг явуулна” гэсэн тайлбар өгөв.