Монгол Улсын Ерөнхийлөгч У.Хүрэлсүх БНСУ-ын Ерөнхийлөгч Мүн Жэ Ин нар 2021 оны Есдүгээр сарын 10-ны өдөр дээд түвшний цахим уулзалт хийлээ.
Тус уулзалтаар хоёр улсын харилцааг “Стратегийн түншлэл”-ийн түвшинд хүргэх тухай тунхаглал гаргасан юм.
Энэ талаар БНСУ-ын Хөх ордны хэвлэлийн төлөөлөгч Пак Кён Ми мэдээллээ.
БНСУ-ын Ерөнхийлөгч Мүн Жэ Ин хэлэхдээ, “Хоёр улсын харилцаа “Стратегийн түншлэл”-ийн түвшинд хүрснээр БНСУ, Монгол Улс нь бүс нутаг болон дэлхий дахины энх тайван, тогтвортой байдлыг хангахад илүү чухал үүрэг гүйцэтгэнэ гэдэгт найдаж байна.
Цар тахлын нөхцөл байдал хэвийн болохоор Монгол Улсад айлчилна" гэжээ.
Хоёр улсын удирдагч нар БНСУ, Монгол Улсын хооронд Эдийн засгийн түншлэлийн хэлэлцээр байгуулах тухай болон харилцааны бусад асуудлаар санал солилцсон байна.
Монгол Улс нь хоёр хөрш болох БНХАУ болон ОХУ-тай “Иж бүрэн стратегийн түншлэл”-ийн харилцаатай юм. Мөн АНУ, Япон, БНЭУ-тай “Стратегийн түншлэл”-ийн харилцаагаа хөгжүүлж байна.
