УИХ-ын гишүүн асан Самандын Жавхлан өнөөдөр АН-ын төв байр болох “Шонхор” тауэрт хэвлэлийн хурал зохион байгуулж, тус намаас гарч буйгаа мэдэгдлээ. Тэр “Хэрүүлтэй айлд хүн тотдоггүй. Ах нар минь цаашид эв эеийг хичээж яваарай” гээд өөрөө уран бүтээлийнхээ ажилд шамдахаар шулуудсанаа сэтгүүлчдэд дуулгав. Далимд нь аймгуудын сүлд дууг дуулж эхэлсэн, ирвэс хамгаалагч Батсүмбэрэл агсны тухай дууны клип удахгүй цацагдах гэж байгаа талаар пиардаад амжлаа.

0рдөө жил гаруйхны өмнө, өнгөрөгч 2020 оны тавдугаар сард АН-ын дарга С.Эрдэнээс АН-ын батлахыг гардан авч “Өнгөрсөн 4 жилд ганцаараа хичээж, дуу хоолойгоо нийтэд хүргэхээр зүтгэсэн ч миний санасанд хүрээгүй. Өнөөдөр олуулаа болж байгаадаа баяртай байна” хэмээн мишээж зогссон экс гишүүн өнөөдөр тус намыг хялайн харах болсонд гайхах нь зүй. Мөн угаас өөрт нь зохиогүй улс төрийн сонирхлоо орхиод урлагийн карьераа үргэлжлүүлэх болсонд талархан хүлээж авах хүн ч олон бий. Гэхдээ яагаад одоо гэж?   

Эх сурвалжийн хэлснээр, 2020 оны сонгуулийн өмнө АН-д элсэж, өөрийн төрсөн нутаг Увс аймгаас нэр дэвшин УИХ-д өрсөлдсөн С.Жавхлан гишүүн удахгүй болох нөхөн сонгуульд дахин нэр дэвшихээр намынхандаа хүсэлт тавьсан мэдээлэл байна. Гэвч намын удирдлагын зүгээс түүний хүсэлтийг хүлээж авалгүй Э.Бат-Үүл, Б.Гарамгайбаатар нарыг нэр дэвшүүлэхээр болсон нь С.Жавхланг АН-ыг орхиход хүргэсэн бололтой.

Товчхондоо, “Би айлгаж туниад гараагүй, гомдол санал байхгүй” гэж хэлсэн УГЖ дуучны үг худлаа болов. Тэр тусмаа “Өөр намд орох уу?” гэсэн сэтгүүлчдийн асуултад хариулт өгөхөөс татгалзсан нь улс төрөөс, улстөрчдөөс бүрмөсөн холдох хүсэл сонирхол байхгүй юм байна гэж дүгнэхэд хүрэв. Сүйрч буй хөлөг онгоцноос хархнууд хамгийн түрүүнд зугтаадаг нь жам. С.Жавхлангийн элсэж амжаагүй дахиад хоёр ч нам парламентад байгаа.

Өнгөрөгч 2020 оны УИХ-ын сонгуульд ялагдсаныхаа төрсөн нутгийнхандаа тунирхаж, нутаг усаа ташуурдаад авсан С.Жавхлан энэ удаа АН-ын дарга нарт “ташуурын амт” үзүүлж буй нь энэ бололтой. Тэгээд АН-ын байрны зай талбайг зээлдэж, хэвлэлийн бага хурал хийсэн нь ч гэсэн зориудын санаатай үйлдэл байж таарна.  

Тэглээ гээд АН ч гэсэн өөрийнхөө аймагт өвдөг шороодоод ирсэн хүнийг нийслэлийн хамгийн том дүүрэг, УИХ-ын хамгийн том тойрогт нэр дэвшүүлж, намаараа тоглолтой биш. Хэрээ мэдэж, бяраа тань гэдэг бил үү?

Эндээс гарч байгаа цор ганц зөв зүй тогтол гэдэг угаасаа ардчилсан намын үзэл санаа, үнэт зүйлийг итгэж үнэмшдэггүй, түүний төлөө хүчин зүтгэх хүсэл эрмэлзэлгүй, дан ганц улс төрийн ашиг хонжоо, өгөө аваа хайж ирдэг, энэ нам дотор амьдардаг хуурмаг ардчилагчид энэ намыг аль болох хурдан орхих нь АН-д ч гэсэн аз завшаантай. Тиймээс энэ цуваа цаашид ч гэсэн үргэлжлээсэй гэж АН-д ерөөе. Тэр тусмаа АН-ын нэрээр улс төрд шургалсан, улс төрд олон жил амьдарсан, ажил албан тушаал хашсан мөртлөө ардчиллын үнэт зүйл, АН-ын үзэл санааг сөрж, нурааж, гишгэлж ирсэн хүмүүсийн дэргэд С.Жавхлангийн энэ үйлдэл юу ч биш.