УИХ-ын 18 /Хэнтий аймаг/, 28 /Сонгинохайрхан дүүрэг/ дугаар тойргийн нөхөн сонгуульд оролцох улс төрийн намуудыг СЕХ-нд бүртгэх ажиллагаа өнөөдөр дуусч байна. Өмнө мэдээлэгдсэнээр улс төрийн есөн нам сонгуульд оролцох хүсэлтээ илэрхийлээд байгаа, СЕХ өнөөдөр эцсийн хариултыг өгнө. Өмнө мэдээлсэнчлэн АН-аас О.Цогтгэрэл, М.Тулгат нар намаа сонгуульд оролцуулахаар СЕХ-нд хүсэлтээ өгсөн ч СЕХ аль алийг нь бүртгэж аваагүй байна. Харин УДШ-эд бүртгэлтэй гэдэг үндэслэлээр С.Эрдэнийн намыг сонгуульд оролцуулахаар бүртгэжээ.

Ингээд АН албан ёсоор гурав тасрав. Харин М.Тулгатын зүгээс АН-ын бүлэг фракциуд болон О.Цогтгэрэл нарт нөхөн сонгуульд эвлэж нэгдэж оролцох уриалга гаргаж, хэлэлцээрийн ширээнд урьсан боловч одоогоор тодорхой ахиц гараагүй байгаа бололтой. Урилга явуулдаг байлаа гэхэд явуулах ёстой хүн нь албан ёсоор С.Эрдэнэ болчихоод байгаа тохиолдолд М.Тулгатын үгийг хэн тоох билээ. 

Гэтэл АН-ын хэсэг залуус, Х.Тэмүүжин нар С.Эрдэнийг намын даргаас огцорч, тамга тэмдгээ хүлээлгэж өгөх шаардлага тавиад сар гаруйн хугацаа өнгөрөөд байгаа. Наадмын өмнө өгсөн уг шаардлагын хариуг С.Эрдэнэ өгөөгүйгээр барахгүй одоо нөхөн сонгуульд нэр дэвшүүлэх эрхтэй цорын ганц хүн болчихоод байна. Гэтэл намууд нэр дэвшигчээ тодруулахад хоёрхон долоо хоногийн хугацаа үлдсэн. Ирэх ёсдүгээр сарын 1 гэхэд СЕХ-нд бүртгүүлэх ёстой. Хэрвээ АН энэ хэвээрээ гурав тасраад сонгуульд орвол УИХ дахь мандатын тоогоо нэг хоёроор ахиулах байтугай намынхаа нэрийг шороотой хутгахаас цаашгүй үлдэнэ.

Тус намын хувьд нэг, хоёр тойргийн төлөө эрх баригч намтай өрсөлдөхөөс илүү нам доторх хэрүүл тэмцлээ цэглэж, нэгдэж нягтрах нь эн тэргүүний, амин чухал зүйл болчихоод байгаа. Үүн дээр АН-ын гурван дарга аль аль нь санаачлага гаргахгүй бол ирэх аравдугаар сард болох нөхөн сонгууль АН-ын хувьд эцсийн цэг болж магадгүй.