УИХ-ын сонгуулийн 18 тойрог /Хэнтий аймаг/, 28 дугаар тойрогт /Сонгинохайрхан дүүрэг/ явуулах нөхөн сонгуулийг ирэх аравдугаар сарын 10-нд явуулахаар УИХ-аас товлон зарласан. УИХ-ын сонгуулийн тухай хуулийн дагуу ээлжит бус, нөхөн сонгуулд өрсөлдөх нам, эвсэл болон бие даан нэр дэвшигчид Аудитын байгууллагаас тогтоосон хугацаанд сонгуулийн мөрийн хөтөлбөр болон хандивын тайландаа дүгнэлт гаргуулах ёстой.
Өчигдөр буюу наймдугаар сарын 10-ны өдрийн байдлаар Үндэсний аудитын газарт МАН, АН, Үнэн ба зөв нам, Шударга иргэдийн нэгдсэн эвсэл нам, Дэлхийн монголчууд нам, Гэр хороолол хөгжлийн нам, Зөв хүн электорат эвсэл, Эрх чөлөөг хэрэгжүүлэгч нам, Ард түмний олонхийн засаглал нам, Иргэний зориг ногоон намууд нөхөн сонгуульд өрсөлдөхөөр мөрийн хөтөлбөр, хандивын тайлангаа ирүүлсэн байв.
АН-ыг төлөөлж тус намын дарга М.Тулгат, Ерөнхий нарийн бичгийн дарга Ч.Өнөрбаяр, ХЭГ-ын дарга Д.Эрдэнэсувд нар сонгуулийн мөрийн хөтөлбөр, хандивын тайлангаа аудитын дээд байгууллагаар баталгаажуулан Сонгуулийн ерөнхий хороонд хүлээлгэн өгсөн боловч тэдний араас О.Цогтгэрэл даргатай бас нэг АН СЕХ-нд материалаа өгчээ. Сануулахад, өнгөрсөн зургадугаар сард болсон Ерөнхийлөгчийн сонгуульд оролцохоор АН бас л хоёр тусдаа материалыг СЕХ-нд хүргүүлж, СЕХ М.Тулгат даргатай АН-ыг бүртгэснээр С.Эрдэнэ нэр дэвшсэн билээ.
Урьд хожид байгаагүй том ялагдлын дараа АН-ын дэд дарга асан Х.Тэмүүжин "Хэрвээ нүх ухаад доошоо үсэрдэггүй л юм бол АН үүнээс илүү дор орох боломж байхгүй" гэж хэлээд УИХ-ын гишүүн Б.Пүрэвдорж, гишүүн асан З.Нарантуяа нарын хамтаар намаа нэгтгэх, АН-ын онц их хурлыг хуралдуулах хөдөлгөөн өрнүүлж, намын жирийн гишүүдийнхээ гарын үсгийг цуглуулж эхэлсэн. Гэвч АН-ын жирийн гишүүдийн дунд өрнөж буй намаа нэгтгэх хөдөлгөөн АН-ын дарга нарыг огтхон ч хөндөөгүйгээр барахгүй одоо байгаагаасаа илүү дор орохын тулд дор дороо уралдан нүх ухаж байна.
Өнгөрсөн Ерөнхийлөгчийн сонгуулиар С.Эрдэнийн авсан таван хувийн санал ганц түүнд биш, АН гэдэг улс төрийн байгууллагад сонгогчийн тавьсан дүн гэдгийг мартаж болохгүй. Үүнд хамгийн их нөлөөлсөн зүйл нь намын дотоод хагарал байсныг санах ёстой.
