Ардчилсан намаас Үндэсний эмгэнэлийн өдрийг зарлуулах тухай мэдээлэл хийлээ.

Ардчилсан намын Ерөнхий нарийн бичгийн дарга Ч.Өнөрбаяр “Монгол Улсын шинээр сонгогдсон Ерөнхийлөгчийн тангараг өргөх ёслол зургадугаар сарын 25-нд болно. Гэтэл энэ өдөр цэргийн ёслолын парад болно гэж байна. Ийм зүйл энэ цаг үед байж болохгүй. Яагаад гэвэл өнөөдрийн байдлаар Монгол Улс 436 иргэнээ цар тахлаар алдчихаад байна. Халх голын дайнд 274 хүнээ алдаад гашуудал зарлаж байсан. Гэтэл өнөөдөр 436 иргэнээ алдчихаад баяр ёслолын байдалтай парад хийж болохгүй. 2021 оны Зургаадугаар сарын 25-ний өдрийг “ҮНДЭСНИЙ ЭМГЭНЭЛИЙН ӨДӨР” болгон зарлах ёстой гэж харж байна. Мөн цар тахлаар нас барсан иргэдийнхээ ар гэрээс уучлал гуйх ёстой.

Цар тахлын улмаас амь насаа алдсан иргэдийн гэр бүлд 10 сая төгрөг өгөхөд 4.3 тэрбум төгрөг. Энэ нь наадам хийх, баяр цэнгэлд зарцуулах мөнгөний 50 хувьд ч хүрэхгүй байна. Ийм байдлаар асуудлыг яагаад шийдэж болдоггүй юм бэ? Монголын төр яагаад хариуцлага хүлээхгүй байгаа юм бэ?

Мөн нэг тэрбум төгрөгөөр 100 жилийн ойн медаль хийж тараах тухай ярьж байна. Гэтэл яагаад энэ мөнгөөр амьсгалын аппарат нэмж авч болохгүй байгаа юм бэ? Миний авсан мэдээллээр Монголд 900 орчим амьсгалын аппарат байгаа юм байна. Энэ нь хаанаа ч хүрэлцдэггүй. Өнгөрсөн хоёр жилийн хугацаанд Засгийн газраас амьсгалын аппаратыг хангалттай хэмжээнд бэлдээгүй юм бэ?

Тэмдэг одон медаль тараахынхаа оронд үндсэн хуулиа эргэж нэг хар. Та бүхэн үндсэн хуулиндаа үнэнч байна гэж тангараг өргөсөн. Үндсэн хууль дээр төр засаг өөрөө иргэнийхээ эрх чөлөөг хангахуйц эдийн засаг, хууль зүйн болон бусад баталгааг хариуцна гэж заасан. Гэтэл Төрийн хариуцлага хаана байна. Иргэнийхээ амь насыг ч хариуцаж чадахгүй байна. Төр өөрөө иргэнийхээ өмнө хариуцлага хүлээдгээрээ ардчилсан нийгэм ялгаатай.

Сайд дарга нар нь эрх ямба эдэлдэг, харин үүрэг хариуцлагаа хүлээх болохоороо зугтаагаад алга болдог байж болохгүй ээ. Улс төрчид асуудлаас зугтаадаг байж таарахгүй. Асуудлыг барьж авч, шийддэг байх ёстой. Асуудлаа зөв тодорхойлоод манлайлаад явах ёстой. Хэн төрд байх нь гол биш, Хэн сайд дарга байх нь ч гол биш. Монголын төр хүлээх хариуцлага байх ёстой" гэсэн юм.