АН-ын гишүүн, Хууль зүйн сайд асан Х.Тэмүүжин, УИХ-ын гишүүн Б.Пүрэвдорж, УИХ-ын гишүүн асан З.Нарантуяа нар өнөөдөр Төрийн ордонд хэвлэлийн хурал хийлээ. Тэд АН-ын эргүүлэн нэгтгэх, нэгтдмэл нэг нам болгон зохион байгуулах, АН-ын Онц их хурлыг зарлан хуралдуулахаар намынхаа 100 мянган гишүүний гарын үсгийг цуглуулах аяныг эхлүүлснээ зарлав.

УИХ-ын гишүүн Б.Пүрэвдорж:

-АН-ын дотоод хагарал угтаа тулж, сая болсон Ерөнхийлөгчийн сонгуулиар 1990 оноос хойш хамгийн бага түвшинд санал авлаа. МАН манай намын дотоод хагарлыг ашиглаж, АН-ын дүрмийн эсрэг сонгуулийн хуулийг батлуулах ажлыг хийлээ. Тийм учраас АН-ын онц их хурлыг зарлаж, нэг удирдлагатай болох хүсэлт, санал санаачилга намын жирийн гишүүдээс маш ихээр ирж байна. Энэ дагуу намынхаа 100 мянган гишүүдийн гарын үсгийг цуглуулах аяныг өнөөдөр эхлүүлж байна. Манай нам албан ёсоор бүртгэлтэй 180 мянган гишүүнтэй. Түүнээс төлөөлөл болгон 100 мянган гишүүний гарын үсгийг цуглуулья. Маргалдагч талуудыг нэг танхимд авчиран хуралдаж, нэг удирдлагатай болох санаачлагыг гаргаж байна. Намын нийт гишүүддээ, энэ аяныг дэмжиж оролцоорой, гарын үсгээ зураарай хэмээн хүсч байна. Аймаг, сум, баг болгонд манай намын үүр, хороод бий. Үүр хороодын дарга нар гишүүддээ дамжуулаарай, дэмжиж ажиллаарай гэж хүсч байна. Үүний үр дүнд АН нэгдмэл удирдлагатай нэг цул болж, сөрөг хүчнийхээ үүргийн амжилттай биелүүлж чадна аа. 

Хууль зүйн сайд асан Х.Тэмүүжин:

-Тамганы булан барьж хуваагдсан хоёр тал нэг нэгэндээ дэгээ тавихаас илүү босч зогсоод, бие биенээ түшээд хамтдаа алхах цаг боллоо. АН-ын тамгыг хэн барихыг МАН шийддэг байх, МАН-д хүчин зүтгэснийхээ төлөө АН-ын тамгыг авч чадна гэсэн тооцоо байж болохгүй ээ. Ардчилсан намгүйгээр явагдаж байгаа сонгууль, ардчилсан хүчингүйгээр өрнөж буй үйл явдалд хохирогч нь иргэд байх болно. АН-ын дарга МАН-ын даргаас тамгаа авдаг биш, АН улс орны хувь заяаг шийддэг нам байхын төлөө нэгдэх цаг болсон. Ийм эв нэгдэлтэй АН-ыг бий болгохын тулд нийт гишүүдийнхээ дэмжлэгийг авах ёстой. Энэ бол АН-ыг шинэчлэх, өөрчлөх тухай санаачилга биш. Энэ бол үнэт зүйл, үзэл баримтлал дээрээ нэг нам болж нэгдэхийг хүссэн санаачилга юм. 

УИХ-ын гишүүн асан З.Нарантуяа:

-Өнөөдрийн энэ аян бол АН-ын дотоод асуудлын тухай биш, улс төрийн хариуцлагатай сөрөг хүчний чадамжийн тухай асуудал юм. Сүүлийн хоёр удаагийн УИХ, орон нутаг, нэг удаагийн Ерөнхийлөгчийн сонгуульд АН нийтдээ таван удаа ялагдал хүлээлээ. Эв нэгдэлгүйн улмаас ийм байдалд хүрлээ. Хэдийгээр энэ удаагийн сонгуульд АН-ын нэрийн дор нэр дэвшсэн хүн хамгийн бага санал авсан ч гэлээ цаана нь сонгуульд оролцоогүй, саналаа өгөөгүй нийт сонгогчдын 42 хувь бий. Энэ хүмүүс сонголтгүй байсан учраас сонгуульдаа оролцоогүй гэж үзэж байгаа. Тэдэнд сонголт бий болгохын төлөө, Үндсэн хуулиараа тунхагласан ардчилсан засаглалыг бий болгох, ардчиллаа сэргээн бататгахын төлөө АН сэргэн босох шаардлагатай. 

Хоорондоо таарахаа байсан сүүлийн үеийн лидерүүдээс болж, АН тарж бутрах ёсгүй. Мянга мянган гишүүдийн маань ардчиллын төлөөх сэтгэл, зүтгэл хэвээрээ байгаа. Монгол Улсад аль ч улс төрийн хүчинд орж, улс төрийн идэвхтэй үйл ажиллагаа явуулах итгэлийг залуучуудад үлдээх ёстой. Хаалттай, хариуцлагагүй улс төрөөс татгалзах цаг болсон. Тийм учраас МАН-ын удирдлагуудад мөн хандаж хэлмээр байна. Ардчилсан намын хагаралтай байдал дээр битгий тоглооч. Улсын дээд шүүхэд намаа бүртгүүлэх улс төрийн чөлөөт сонголтыг нь өгөөч гэж уриалмаар байна.