Х.Баттулга Төрийн тэргүүний хувиар хамгийн сүүлчийн ярилцлагаа өгөв. Монголын бүхий л телевизүүдийн эфирийн худалдаж авсан түүний ярилцлагын гол зорилго нь МАН-д чиглэжээ. Ингэхдээ үгэн дотроо үг хавчуулж МАН-д битгий саналаа өгөөрэй л гээд хэлчихлээ.

Түүний ярилцлага тогтуун сайхан, төлөв төвшин болсон. Нөгөө талаасаа өнгөрсөн дөрвөн жилийнхээ ажлыг дүгнэсэн маягтай өрнөсөн ч үнэндээ МАН-ыг голдуу асууж, МАН руу чиглэж аядуу зөөлнөөр сумаа тавиад яриагаа өндөрлөв. Хэдийгээр наанаа У.Хүрэлсүхтэй муудаагүй, аятай сайхан байгаа ч цаанаа түүний өсөө хорсол нь хэвээр үнэндээ МАН-ыг муулах замаар МАН-ыг нэр дэвшигчийг битгий сонгоорой гэсэн мессеж өглөө.

Ингээд түүний онцлох эшлэлүүдийг хүргэж байна.

• Ерөнхийлөгчөөр нэр дэвшихгүй болсондоо харамсахгүй байна.

• Ерөнхий сайдыг огцрохоо зарлах хүртэл би энэ шийдвэрийг нь мэдээгүй байсан.

• Ерөнхий сайдыг огцролтыг МАН-ын Удирдах зөвлөл, хуучнаар улс төрийн товчоо шийдсэн.

• Ерөнхий сайд У.Хүрэлсүх "үргээлгэнд" орсон.

• У.Хүрэлсүхтэй муудалцсанаасаа хойш уулзаагүй.

• У.Хүрэлсүх намайг Салхитын мөнгөний ордыг авах нь гэж бодсон.

• Ерөнхийлөгч В.Путиныг Монголд айлчлах үед Х.Баттулга Ерөнхийлөгч газрын зураг барьж ороод хийн хоолойг Монголоор дайруулах санал тавьж, Саяны нурууг дагуулж хүнд нөхцөлд тавихын оронд төмөр замаа дагуулаад тавих тооцооллыг танилцуулсан.

• Мөнгө өгөөд л сонгуульд оролцдог. Сонгууль хуурамч болоод байна.

• МАН хэлсэн амлалтаа биелүүлээгүй.

• 100 жилийн түүхтэй МАН-ын байрыг харчих. 30 жилийн түүхтэй АН-ын байрыг харчих. Нөгөө гучин гаруй намуудынхаа байрыг харчих. Ингээд ирэхээр шударга өрсөлдөөн байхгүй. Шударга өрсөлдөөн байхгүй учраас шударга сонгууль байхгүй.

• Оюутолгой, Эрдэнэт, Таван толгой гэсэн гурван том ордыг Ардын намынхан л барьлаа.

• Бүх намууд нэг гараанаас дахин эхлэх хэрэгтэй гэсэн үндсээр Ардын намыг тараах асуудлыг хөндөж, Улсын дээд шүүхэд хандсан.

• Сонгуулиар хэний ч танихгүй хүн УИХ-д сонгогдож гарч ирээд байгаа биз. Тэр хүн яаж гарч ирж байна гэхээр мөнгөөр л гарч ирж байгаа юм.

• Би УИХ-ын индэр дээрээс энэ Их Хуралд байгаа гишүүдийн 50-иас илүү хувь нь гэмт хэрэгтнүүд байна аа гэхэд нэг гишүүн над дээр гомдол гаргаагүй.

• Оффшор бүсэд хууль бусаар гарчихсан 4 их наяд төгрөг байгаа. Үүнийг оруулж ирэх төрийн данс байхгүй. Энэ дансыг УИХ-аар хэлэлцүүлж нээдэг. Энэ дансыг нээж өгөхгүй өнөөдрийг хүрсэн.

• Рио Тинтой Монголын Засгийн газрыг унагасан.

• Та нар төрөө сонгож чадахаа байсан. Та нар төрөө удирдаж чадахаа байсан гэдгийг би ард түмэндээ хэлчихмээр байна.