Гадаад харилцааны сайд Б.Батцэцгийн ОХУ-д хийж буй айлчлал үргэлжилж байна.
Тэрээр ОХУ-ын “Газпром” компанийн тэргүүн А.Б.Миллертэй 2021 оны Зургаадугаар сарын 2-ны өдөр Санкт-Петербург хотноо уулзлаа.
Уулзалтын үеэр ОХУ, БНХАУ-г холбосон байгалийн хийн хоолойг Монгол Улсын нутаг дэвсгэрээр дамжуулан барих төслийн явцын талаар санал солилцож, төслийн судалгааны ажил амжилттай урагшилж байгаад сэтгэл ханамжтай байгаагаа илэрхийлэв.
Төслийн хэрэгжилтийг урагшлуулахын тулд хийн хоолойн асуудлаарх Монгол, Оросын Засгийн газар хоорондын хэлэлцээрийн төслийг боловсруулж эхлэхээр тохиролцов. Хийн хоолойн салбарт ажиллах Монголын мэргэжилтнүүдийг бэлтгэхэд хамтран ажиллах боломжтойг А.Б.Миллер илэрхийлжээ.
