Иргэдийн гар дээр өгсөн 300 мянга гурав хоногийн дотор дуусч, залгаад вакцины эрэл хайгуул эхэллээ. Хөл хорио эхлэхтэй зэрэгцэн /2021.04.09-ний орой/ зарласан "Вакцинжуулалтыг зогсоолоо" гэдэг үг цэлмэг тэнгэрээс цахилгаан цахихтай адилхан болсон биз ээ. Тэгээд тэрийгээ хэрхэх яахыг нь харж, тестелж байгаад хоёр хоногийн дараа "Зөвхөн 60-аас дээш насныхныг вакцинжуулна"...  Хулганы хавханд хэзээ ч үнэгүй бяслаг байдаггүй юмаа гэж эс хэллүү. 

Уг нь бол вакцинаар тасалж байгаад нийтээр нь алах гээд байгаа ч юм биш байх л даа. Зүгээр л вакцин нь байхгүй. Хийгээд өгье гэсэн ч байхгүй. Нөгөө Хүрэлсүхийн Засгийн газрын үед хандивлагчдаас гуйгаад, нуугаад л жил тойрон явсан 50 сая долларын санхүүжилт чинь /өөрсдөө болохоор таван их наядаар тансаглачихсан/ дөнгөж хоёр сарын өмнө л Дэлхийн банкнаас батлагдсан шүү дээ. "Бид л оролцохгүй бол аргагүй энэ улс сүйрэх юм байна" гэсний үндсэн дээр энэ мөнгийг манайд өгсөн байх.

Тэрнээс бусад бүх вакцинууд хандиваар буюу гуйлгаар орж ирж байгаа. Авах хүн бөхийж, өгөх хүн гэдийдэг гэдэг болохоор нөгөө хүн алга тэнийх хүртэл бид бөхийсөөр л байх болно. Ядаж байхад бөхөлзөн барин жаахан юм салгангуутаа буруу хараад мартчихна аа, нөгөөдүүл чинь. "Монголын Гадаад хэргийн яам вакцинаа хүлээж авчихаад хандивлагч орнуудын нэрийг дурьдсангүй" гээд Европын холбоо бөөн гомдол болоо биз дээ. 

Шадар сайдын /УОК-ийн дарга/ хэвлэлийн төлөөлөгч энэ тухай "Коронавирусийн эсрэг вакцины татан авалт дөрөвдүгээр сарын 20-ноос эхлэн нэмэгдэнэ. Халдварын тархалт нэмэгдэж өдөрт 600-800 орчим бүртгэгдэж байгаа нь том эрсдэл. Халдварын тархалт буурсны дараа дархлаажуулалт хийгдээд явах боломжтой" гэж. 

Өөрөөр хэлбэл, "вакцин байхгүй, байсан ч хийхгүй. Тийм болохоор дуугай гэртээ дүмбийгээд хөл хориогоо дуусга. Эхлээд вакцин нь ирээтхэг. Тэрний дараа бас юу ч болоо билээ" л гэж байна. Ямар ч хамаагүй аргаар цаг цаг хожих л гэсэн санаа байх л даа. Хүнээр бол "Вакцины хоёр дахь тунгаа эхлэхгүй бол эхний хийлгэсэн вакцин маань үр дүнгүй шатах гээд байна. Вакцинаа хангалттай татаж авсны дараа эхний тунгаа үргэлжлүүлье" гэсэн үг байх. Тэрийгээ даанч аягүй муухай ойлгомжгүй, морзын дохио шиг хэлээр дамжуулдаг. 

Дээр нь Ерөнхий сайд, Шадар сайд хоёр нь хоёр тийшээ суучихсан юм дагуу. Коронавирустай үнэхээр тэмцэх гэж байгаа бол Ерөнхий сайд нь удирдлагыг гартаа ав аа. УОК, НОК гэсэн байнгын үйл ажиллагаагүй, доороо бүтэцгүй нэгжээр удирдуулаад коронавирусыг ялна гэж байхгүй шүү гээд мэргэжлийн зарим хүмүүс бүр эхнээс нь л хэлээд байсан. Ядаж л ЭМЯ нэг шийдвэр гаргаад, тэрийгээ УОК-оор оруулаад, тэр нь цаашаа Засгийн газрын хуралдаан дээр танилцуулагдсаны дараа батлагддаг тийм балай завхарсан, цаг хугацаа, хүч нөөц барсан ажил байж болохгүй шүү дээ.

Даанч манай Ерөнхий сайд нарын нэг нь ч үүнийг сонсоогүй. Одоо тэгээд Онцгой комисс, Засгийн газар хоёр нь өөд өөдөөсөө духаараа хараад суучихсан юм шиг л ойлгогдож байна. Ерөнхий сайд нь мөнгө тараагаал, Шадар сайд нь вакцинаа таслаал...

Тэгээд хэрвээ вакцин тасалдсан нь С.Амарсайхантай холбоотой юм бол түүнийгээ зүгээр л зайлуулчих л даа. Тэрийгээ заавал өөр хүмүүсээр батлуулж, хогийн тантан болгох гээд хүлээгээд суух шаардлага юу байна?

Б.ЗАЯА